ന്യൂഡല്ഹി: പാലക്കാട് ഉള്പ്പെടെ രാജ്യത്ത് ഇനിയൊരു കോച്ച് ഫാക്ടറി ആവശ്യമില്ലെന്ന് റെയില്വെ ലോക്സഭയില് അറിയിച്ചു. എംപിമാരായ എം.ബി രാജേഷും എ. സമ്പത്തും രേഖാമൂലം നല്കിയ ചോദ്യത്തിനു മറുപടിയായാണ് കേന്ദ്രം നിലപാട് വ്യക്തമാക്കിയത്. റെയില്വെ സഹമന്ത്രിയാണ് ചോദ്യത്തിനു മറുപടി നല്കിയത്.
കോച്ചുകളുടെ ലഭ്യത ഉറപ്പാക്കാന് നിലവിലുള്ള കോച്ച് ഫാക്ടറികള് മുഖേന സാധിക്കുന്നുണ്ട്. അതിനാല് പുതുതായി കോച്ച് ഫാക്ടറികള് സ്ഥാപിക്കേണ്ട സാഹചര്യം ഇല്ലെന്നാണ് മന്ത്രി ലോക്സഭയെ അറിയിച്ചത്.
നേരത്തെ എം.ബി രാജേഷ് എംപിക്ക് ഇക്കാര്യം ചൂണ്ടിക്കാട്ടി റെയില്വെ മന്ത്രി പിയൂഷ് ഗോയല് കത്ത് അയച്ചിരുന്നു. പാലക്കാട് കോച്ച് ഫാക്ടറിയുടെ ആവശ്യം ഇല്ലെന്നായിരുന്നു കത്തില് മന്ത്രി വ്യക്തമാക്കിയിരുന്നത്.