ബഷീറിന്റെ പുസ്തകക്കട ബോള്‍ഗാട്ടിയില്‍

കൊച്ചി:  എറണാകുളം ബോട്ട് ജെട്ടിക്ക് എതിര്‍ വശത്തുള്ള കാനണ്‍ ഷെഡ് റോഡിലായിരുന്നു ബഷീറിന്റെ പ്രസിദ്ധമായ ബുക് സ്റ്റാള്‍. കൃതി സാഹിത്യ-വിജ്ഞാനോത്സവം അരങ്ങേറുന്ന ബോള്‍ഗാട്ടിയില്‍ ബഷീറിന്റെ ആ പുസ്തകക്കടയുടെ ഓര്‍മയ്ക്ക് നാലു ദിവസത്തേയ്ക്ക് ഒരു പുസ്തകക്കട തുറന്നിട്ടുണ്ട്.

കൃതിയില്‍ പങ്കെടുക്കുന്ന 330-ഓളം വരുന്ന വിദേശ, ഭാരതീയ, മലയാളി എഴുത്തുകാരുടെ പുസ്തകങ്ങള്‍ ഇവിടെ വില്‍പ്പനയ്ക്കും പ്രദര്‍ശനത്തിനുമുണ്ട്.

എസ്പിസിഎസിന്റെ ആദ്യകാല അമരക്കാരായ കാരൂര്‍, എം. പി പോള്‍, തകഴി, പൊന്‍കുന്നം, ലളിതാംബിക അന്തര്‍ജനം എന്നിവരുടെ പേരുകളിലാണ് ബോള്‍ഗാട്ടിയിലെ വിവിധ സെഷനുകള്‍ അരങ്ങേറുന്ന വേദികള്‍.

ഒപ്പം മലയാളത്തിലെ എക്കാലത്തെയും മികച്ച കഥകളും നോവലുകളും പ്രചരിപ്പിച്ച മഹാനായ എഴുത്തുകാരനായ ബഷീറിനും കൃതി അങ്ങനെ സ്മാരകമൊരുക്കിയിരിക്കുന്നു.