follow us

1 USD = 64.550 INR » More

As On 25-05-2017 15:49 IST

വൈകാതെ തമിഴ്‌നാട്ടിൽ ഒരു അട്ടിമറി ആർക്കും പ്രതീക്ഷിക്കാവുന്നതാണ്. അതിന്റെ ട്രെയിലർ ആണ് ഇപ്പോഴത്തെ ജെല്ലിക്കട്ടും മറീന സമരവും

ജല്ലിക്കെട്ടൊരു വള്ളിക്കെട്ടായി ! ചിന്നമ്മ അമ്മയെ ഒഴിവാക്കി കാത്തുസൂക്ഷിച്ച കസേര കാക്ക കൊത്തി ? കളം അറിഞ്ഞു വിത്തെറിഞ്ഞ് കലൈഞ്ജര്‍

ദാസനും വിജയനും » Posted : 24/01/2017

ജല്ലിക്കെട്ടിലെ രാഷ്ട്രീയം തമിഴ്‍നാട്ടിനെ പിടിച്ചു കെട്ടുമ്പോൾ ഇന്ത്യയിൽ മറ്റൊരു മുല്ലപ്പൂ വിപ്ലവം ജനിക്കുകയാണ്. ഒരു ചക്ക ഇട്ടപ്പോൾ മുയൽ ചത്ത സ്ഥിതിക്ക് മൊത്തം ചക്ക ഇടുവാൻ ഇറങ്ങിയ അമിട്ട് ഷാജിക്കും മറ്റുള്ളവർക്കും പണി പാലുംവെള്ളത്തിൽ കിട്ടുമ്പോൾ ഇന്ത്യയിലെ ഏറ്റവും കൂടുതൽ എംപി മാരുള്ള സംസ്ഥാനങ്ങൾ അവരെ കയ്യൊഴിയുകയാണ് .



തമിഴ്‌നാട്ടിൽ അമ്മയുടെ മരണശേഷം അല്ലെങ്കിൽ അമ്മയെ വകവരുത്തിയതിന് ശേഷം ചിന്നമ്മയിലൂടെ ഒരു പിൻവാതിൽ പ്രവേശനം സ്വപ്നം കണ്ട അമിട്ട് ഷാജി ജെല്ലിക്കെട്ട് എന്നൊരു ട്വിസ്റ്റ് ഇങ്ങനെ ആവുമെന്ന് അവരുടെ രാഷ്ട്രീയ ഉപദേശകരായ ഫ്രീ മേസൻമാർ വരെ ചിന്തിച്ചു കാണുവാൻ ഒരു വഴിയും കാണുന്നില്ല.

കലൈഞ്ജറുടെ / മകന്‍റെ കാഞ്ഞ ബുദ്ധി !!

അമ്മയുടെ വിയോഗത്തിനുശേഷം തലേ കല്ലൻ കലൈഞ്ജർ മകനെ പാർട്ടി ഏൽപ്പിക്കുമ്പോൾ പലതും മനസ്സിൽ കണ്ടു. ചുമ്മായൊന്നും മധുരൈ ചക്രവർത്തി അഴഗിരിയെ വീട്ടിലെ അടുക്കളയിൽ ഇരുത്തി സ്റ്റാലിനെ ചെങ്കോൽ ഏൽപ്പിക്കില്ല.

നല്ല സമയത്ത് തന്നെ ശരീരത്തിലെ മുഖ്യമായ എല്ലാ അവയവയങ്ങളും മാറ്റിവെച്ചുകൊണ്ട് എംജിആറിനും അമ്മയ്ക്കും പറ്റിയ അബദ്ധങ്ങൾ പറ്റാതെ നോക്കിയപ്പോൾ 92 വയസ്സിലും തമിഴന്റെ മനസ്സും മനസ്സിലിരിപ്പും മനസ്സിലാക്കുവാൻ സാധിച്ചു .

വൈകോ പറയുന്നു അങ്ങേരാണ് ആ ജെല്ലിക്കെട്ട് കളികൾക്ക് പിന്നിലെന്ന്. വിജയകാന്ത് പറയുന്നു പുള്ളിയാണ് പുലിയെന്ന്. പക്ഷെ ഇവരൊന്നുമല്ല ഇതിന്റെ പിറകിൽ. നമ്മുടെ കലൈഞ്ജറുടെ നിർദ്ദേശപ്രകാരം ചെന്നൈ വീരൻ സ്റ്റാലിൻ തന്നെ ബുദ്ധി. അഞ്ച് ലക്ഷം പേരെ മറീനയിൽ എത്തിക്കേണ്ടത് അവരുടെ ആവശ്യം തന്നെയായിരുന്നു. അതും ഒരു തരത്തിൽ ശക്തിപ്രകടനം.

ചിട്ടപ്പെടുത്തിയ ഈണത്തില്‍ ഒരുങ്ങിയ മുദ്രാവാക്യങ്ങള്‍ എങ്ങനെ ഉണ്ടായി ?


അമ്മയെ കാണാൻ കഴിഞ്ഞ മാസം ഒഴുകിയെത്തിയ ജനതക്ക് ബദലായി ഒരു സമ്മേളനം എന്ന് വേണമെങ്കിലും നമ്മുക്ക് പറയാം. മോഡിക്കെതിരെയും ഒപിആറിനെതിരെയും ചിന്നമ്മക്കെതിരെയും വളരെ ഈണത്തിൽ നല്ല കാണാൻ ശേലുള്ള പെൺകുട്ടികൾ ഒരേപോലെ ആർത്തട്ടഹസിച്ചുകൊണ്ട് മുദ്രാവാക്യം വിളിക്കുമ്പോൾ എല്ലാറ്റിലും ഒരു നല്ല ഇവന്റ് മാനേജ്‌മെന്റ് കമ്പനിരീതി കാണുന്നു.

മധുരയിലെ മുദ്രാവാക്യവും ചെന്നൈയിലെ മുദ്രവാക്യവും കോവയിലെ മുദ്രാവാക്യവും ട്രിച്ചിയിലെ മുദ്രാവാക്യവും ഒന്നുതന്നെ. അതുപോലെ മുദ്രാവാക്യം വിളിക്കുന്നത് എല്ലാം നല്ല വിദ്യാഭ്യാസമുള്ള തന്റേടമുള്ള തമിഴ് പെൺകൊടികൾ എല്ലാം ഉറപ്പിച്ചു തന്നെ. ഒരു നല്ല ഇവന്റ്മാനേജ്‌മെന്റ് കമ്പനിയോ അല്ലെങ്കിൽ ഐഐഎം പോലത്തെ സ്ഥാപനങ്ങളോ പ്രോജക്ട് ഏറ്റെടുത്തത് പോലത്തെ ധൈര്യം .

അഞ്ചാറ് ദിവസം കൊണ്ട് ഒപിഎസ് ഒപിആർ അടിക്കാതെ ഉറങ്ങാൻ വയ്യാത്ത അവസ്ഥയിൽ എത്തിക്കുവാൻ കഴിഞ്ഞത് ഒരു വിജയം. പിന്നെ തേവർ മക്കളുടെ ഹൃദയമായ അളഗനല്ലൂരിൽ തേവർമക്കളുടെ നേതാവായ ഒപിഎസിനെ കയറ്റിയില്ല എന്നതും ചിന്തിക്കുക. ചിന്നമ്മ വളരെ പ്ലാൻ ചെയ്തു കൂട്ടിയ മുഖ്യമന്ത്രി കസേര അമ്മയുടെ സഹതാപതരംഗത്തിലൂടെ ആകാമെന്നത് ജെല്ലിക്കെട്ട് തകർത്തു.

നഷ്ടം മോഡിജിക്കും ചിന്നമ്മക്കും ?


ഒന്നര മാസം മുൻപ് വിടവാങ്ങിയ അമ്മയെ മക്കൾ എല്ലാം മറന്നുകൊണ്ട് പുതിയൊരു ജെല്ലിക്കെട്ട് സംസ്കാരം തമിഴ്‍നാട്ടിൽ ഉടലെടുത്തു. ഈ പോരാട്ടത്തിൽ ഏറ്റവും നഷ്ടം സംഭവിച്ചതും സംഭവിക്കുവാൻ പോകുന്നതും മോഡിജിക്കും ചിന്നമ്മക്കും മാത്രമാണെന്നതാണ് വസ്തുത.

"അമ്മ മരിച്ചതു മുതൽ മോഡിജിയും കൂട്ടരും മനസ്സിൽ കണക്കുകൂട്ടിയതും അന്നേവരെ ആർക്കും വേണ്ടാത്ത ചിന്നമ്മയുടെ തലയിൽ തൊട്ടതും എല്ലാം പല തരത്തിലുള്ള സമവാക്യങ്ങളുടെ ബാഹ്യ ലക്ഷണങ്ങൾ ആയിരുന്നുവെന്നത് മുൻകൂട്ടി കാണുവാൻ സ്റ്റാലിനായി എന്നതാണ് സത്യം.

വൈകാതെ തമിഴ്‌നാട്ടിൽ ഒരു അട്ടിമറി ആർക്കും പ്രതീക്ഷിക്കാവുന്നതാണ്. അതിന്റെ ട്രെയിലർ ആണ് ഇപ്പോഴത്തെ ജെല്ലിക്കട്ടും മറീന സമരവും. കോടതിയും കേന്ദ്രവും അനുമതി കൊടുത്തിട്ടും ജെല്ലിക്കെട്ട് കളിയ്ക്കാൻ വിടാതെ മറീനയിൽ കടലിലേക്ക് നീങ്ങുന്ന ചെറുപ്പക്കാരാണ് തെളിവ് .

എങ്ങനെയെങ്കിലും പോലീസിനെക്കൊണ്ട് അഞ്ചാറെണ്ണത്തിനെ തീർത്തുകിട്ടിയാൽ ഒപിആറും ചിന്നമ്മയും കൂട്ടരും മധുരക്ക് പോകേണ്ടി വരും. ചിന്നമ്മയെ തലോടിയതുപോലെ ആർക്കും വേണ്ടാതെ നിന്നിരുന്ന മറ്റൊരു ചെകുത്താനെ കൂടി അമിട്ടഷായും മോഡിയും തഴുകി നോക്കി. അതും എൺപത് ലോകസഭാ സീറ്റുകൾ ഉള്ള ഉത്തരപ്രദേശത്തിൽ , അവിടെ അമർസിംഗ് എന്ന മഹാകള്ളനെ കൂട്ടുപിടിച്ചു കൊണ്ട് കളിച്ചു.

പിതാജിയും മകനും കളിച്ച കളി !

എങ്ങനെയെങ്കിലും അഖിലേഷ് എന്ന പയ്യനെയും അവന്റെ പാർട്ടിയെയും രണ്ടുവഴിക്കാക്കിയാൽ അമർസിംഗിന്റേയും കൂട്ടരുടെയും കള്ളപ്പണം വെളുപ്പിച്ചുകൊടുക്കാം എന്നതായിരുന്നു ഡീൽ. കിട്ടിയ അവസരം മുതലാക്കുവാൻ അമർസിങ്ങും തീരുമാനിച്ചതനുസരിച്ച് അമ്മാവനിലൂടെ കളി തുടങ്ങി.

ഇക്കളികൾ മണം പിടിച്ച അഖിലേഷ് അച്ഛനുമായി മറ്റൊരു കളി പ്ലാൻ ചെയ്തു. അങ്ങനെ അച്ഛനും മകനും വഴിപിരിയുവാൻ പ്ലാൻ . വിമതന്മാരായി കണ്ടിരുന്ന 25 പേര് അച്ഛന്റെ കൂടെയും ബാക്കിയുള്ളവർ മകന്റെ കൂടെയും കൂടിയപ്പോൾ അമ്മാവൻ ശരിക്കും കൺഫ്യൂഷനിൽ.

എംഎൽഎ മാർക്കുവേണ്ടി അച്ഛനും മകനും തർക്കം, ചിഹ്നത്തിനുവേണ്ടി അച്ഛനും മകനും തർക്കം, പാർട്ടിക്കുവേണ്ടി അച്ഛനും മകനും തർക്കം . ഒടുവിൽ അച്ഛനും മകനും മരുമകളും ഒന്നിച്ചപ്പോൾ അച്ഛന്റെ ലിസ്റ്റ് മകനും അംഗീകരിച്ചപ്പോൾ അമർസിംഗ് ഔട്ട് അസംഖാൻ ഹീറോയുമായി .

അഖിലേഷിന്‍റെ ഉപദേശകന്‍ ആലപ്പുഴക്കാരൻ


മൈസൂരിലെ ജെഎസ്എസ് കോളേജിൽ പഠിക്കുമ്പോൾ പരിചയപ്പെട്ട ഒരു ആലപ്പുഴക്കാരൻ ആണ് അഖിലേഷിന്റെ ആദ്യ ഉപദേശകൻ. അദ്ദേഹത്തിൻറെ ഉപദേശപ്രകാരം തിരഞ്ഞെടുപ്പിന് ഒരു വര്‍ഷം മുൻപ് സ്ഥാനാർത്ഥികളെ പ്രഖ്യാപിച്ചുകൊണ്ട് അഖിലേഷ് ഏവരെയും ഞെട്ടിച്ചു. മൂന്നിൽ രണ്ടു ഭൂരിപക്ഷവുമായി മുഖ്യമന്ത്രി കസേരയിൽ കയറുമ്പോൾ ഇല്ലാത്ത ആത്മവിശ്വാസം ഇന്നിപ്പോൾ അഖിലേഷിനുണ്ടെന്ന് തെളിഞ്ഞു.

കള്ളപ്പണം വെളുപ്പിക്കുവാൻ പോയ മോഡിയും മുസാഫർപൂരിൽ അടിയുണ്ടാക്കി ചോര കുടിച്ച അമിട്ട് ഷാജിക്കും ഇപ്പോൾ കണ്ണിലെ കരടായി. കള്ളപ്പണക്കാർ ഉള്ളതുകൊണ്ടാണ് ഇന്ത്യ ഇപ്പോഴും റിസഷനുകളെ അതിജീവിച്ചുകൊണ്ട് മുന്നേറുന്നതെന്ന് അഖിലേഷ് തുറന്നടിച്ചു. ഇനിയിപ്പോൾ കേന്ദ്രം ഭരിക്കുന്നവർ തത്ക്കാലം അവരുടെ ഉപദേശകരെ മാറ്റി പുതിയ എന്തെങ്കിലും ടെക്‌നിക് ഉപയോഗിച്ചില്ലേൽ എല്ലാം പോകും.

അച്ഛാ ദിൻ കാത്തിരിക്കുന്ന കോടിക്കണക്കിന് പാവപ്പെട്ടവർ അക്കൗണ്ടുകൾ തുറന്നു ഡിജിറ്റലായി കാത്തിരിക്കുന്നു പതിനഞ്ച് ലക്ഷത്തിനായി . എന്നെങ്കിലും ആ പണം പ്രധാനമന്ത്രി തരുമെന്ന പ്രതീക്ഷയിലാണ് എന്നും വോട്ടു മാത്രം ചെയ്യുന്ന നമ്മുടെ നാട്ടിലെ പാവപ്പെട്ടവരായ ജനത .

ഇനിയെങ്കിലും ജല്ലിക്കെട്ടിൽ തൊടാതെ കളിച്ചാൽ നിങ്ങൾക്ക് നല്ലത്. ഇനിയെങ്കിലും മുസാഫർപൂർ ഇല്ലാതെ നോക്കിയാൽ നിങ്ങൾക്ക് നല്ലത്. ഇനിയെങ്കിലും ഇന്ത്യൻ ജനതയെ കള്ളപ്പണക്കാരായി കാണാതിരുന്നാൽ നിങ്ങൾക്ക് നല്ലത്. ഇനിയെങ്കിലും തള്ളാതെ ജീവിച്ചാൽ അതും നല്ലത്.

ഇപ്പോൾ കുട്ടികൾക്ക് ഇത്രമാത്രം മതിയെന്ന് പറഞ്ഞുകൊണ്ട്,

അളകനല്ലൂരിൽ നിന്നും ദാസനും, മുസാഫർപൂരിൽ നിന്നും വിജയനും






:) Your LIKE & SHARE can do More Than You Think !
Loading...

More News

:( » © Sathyam Online.Com » 2011 - 2017. All Rights Reserved » Powered By : DesignMedia.in - Google+