ഡീന്‍ ജോണ്‍സ്‌ കുഴഞ്ഞു വീണത് ഹോട്ടല്‍ ലോബിയില്‍, സിപിആര്‍ നല്‍കാന്‍ ബ്രെറ്റ് ലീ ശ്രമിച്ചതായി റിപ്പോര്‍ട്ട്

മുംബൈ:  മുംബൈ ഹോട്ടലിലെ ലോബിയില്‍ കുഴഞ്ഞു വീണതിന് പിന്നാലെ പിസിആര്‍ നല്‍കി ഡീന്‍ ജോണ്‍സിനെ തിരികെ കൊണ്ടുവരാന്‍ ബ്രെറ്റ് ലീ ശ്രമിച്ചതായി റിപ്പോര്‍ട്ട്.

ഓസ്‌ട്രേലിയന്‍ മാധ്യമങ്ങളാണ് ഇക്കാര്യം റിപ്പോര്‍ട്ട് ചെയ്യുന്നത്. ബ്രെറ്റ് ലീക്കൊപ്പം ഹോട്ടല്‍ ലോബിയില്‍ പ്രവേശിച്ച സമയത്താണ് ഡീന്‍ ജോണ്‍സ് കുഴഞ്ഞു വീണതെന്ന് ഡെയ്‌ലി മെയില്‍ ഓസ്‌ട്രേലിയയുടെ റിപ്പോര്‍ട്ടില്‍ പറയുന്നു. വ്യാഴാഴ്ച രാവിലെ പ്രഭാത നടത്തത്തിനായി അദ്ദേഹം പോയിരുന്നതായി അടുത്ത സുഹൃത്തുക്കളും പറയുന്നു.

എല്ലാം സാധാരണ പോലെ പോവുകയായിരുന്നു എന്നാണ് ഡീന്‍ ജോണ്‍സിനൊപ്പം കമന്ററി പാനലില്‍ ഉള്‍പ്പെട്ട ഇന്ത്യന്‍ മുന്‍ താരം ഇര്‍ഫാന്‍ പഠാന്‍ പ്രതികരിച്ചത്. പെട്ടെന്നുണ്ടായ ഹൃദയാഘാതത്തെ തുടര്‍ന്നാണ് ഡീന്‍ ജോണ്‍സിന്റെ മരണം എന്നാണ് സ്റ്റാര്‍ ഇന്ത്യ പ്രസ്താവനയില്‍ പറയുന്നത്.

ഓസ്‌ട്രേലിയക്ക് വേണ്ടി 52 ടെസ്റ്റുകളില്‍ നിന്ന് 46.55 എന്ന ബാറ്റിങ് ശരാശരിയില്‍ 3,631 റണ്‍സ് ആണ് ജോണ്‍സ് സ്‌കോര്‍ ചെയ്തത്. 11 സെഞ്ചുറിയും 14 അര്‍ധ സെഞ്ചുറിയും ഇതില്‍ ഉള്‍പ്പെടുന്നു. ഓസ്‌ട്രേലിയക്ക് വേണ്ടി 164 ഏകദിനങ്ങള്‍ കളിച്ച അദ്ദേഹം 44.61 എന്ന ബാറ്റിങ് ശരാശരിയില്‍ 6,068 റണ്‍സും കണ്ടെത്തി. ആറ് ശതകവും, 46 അര്‍ധ ശതകവും ഇതില്‍ ഉള്‍പ്പെടുന്നു.