New Update
ന്യൂഡല്ഹി: ഈ വര്ഷത്തെ ജെഇഇ മെയിന് പരീക്ഷ അടുക്കുമ്പോള് പരമാവധി സുരക്ഷ ഉറപ്പാക്കുന്നതിനും സുഗമമായി പരീക്ഷ നടക്കുന്നതിനും എന്തൊക്കെ മാര്ഗനിര്ദ്ദേശങ്ങളാണ് പാലിക്കേണ്ടതെന്നാണ് പരീക്ഷയെഴുതുന്നവര് അറിയാന് ആഗ്രഹിക്കുന്നത്.
Advertisment
കൊവിഡ് വ്യാപനത്തിന്റെ പശ്ചാത്തലത്തില് കൂടുതല് നിര്ദ്ദേശങ്ങളും സുരക്ഷാ മാനദണ്ഡങ്ങളും പരീക്ഷാ മാര്ഗനിര്ദ്ദേശങ്ങളില് കൂടുതലായി ഉള്പ്പെടുത്തിയിട്ടുണ്ട്.
ജെഇഇ മെയിന് 2020-പ്രധാന പരീക്ഷാ ദിന മാര്ഗനിര്ദ്ദേശങ്ങള്
- കൊവിഡ് വ്യാപനത്തിന്റെ പശ്ചാത്തലത്തില് പരിശോധന, സാനിറ്റൈസേഷന് തുടങ്ങിയ മുന്കരുതല് നടപടികള് സ്വീകരിക്കേണ്ടതിനാല് കൂടുതല് സമയം അധികൃതര്ക്ക് എടുക്കേണ്ടി വരും. അതുകൊണ്ട്, പരീക്ഷാര്ത്ഥികള് കുറഞ്ഞത് ഒരു മണിക്കൂര് മുമ്പെങ്കിലും പരീക്ഷാകേന്ദ്രത്തിലെത്തണം.
- കേന്ദ്രങ്ങളിലെത്തുന്നതിന് പരീക്ഷാര്ത്ഥികള്ക്ക് പ്രത്യേക സ്ലോട്ടുകള് അനുവദിക്കുമെന്ന് എന്ടിഎ ഡയറക്ടര് വിനീത് ജോഷി പറഞ്ഞു. ഇത് പരീക്ഷയെഴുതുന്നവര് പാലിക്കുകയും അവര്ക്ക് അനുവദിച്ചിരിക്കുന്ന നിശ്ചിത സമയത്ത് മാത്രം അവിടെ എത്തുകയും വേണം.
- ജെഇഇ മെയിന് പരീക്ഷയുടെ അഡ്മിറ്റ് കാര്ഡും ഐഡന്റിറ്റി പ്രൂഫും ഇല്ലാത്തവരെ പരീക്ഷാകേന്ദ്രത്തില് പ്രവേശിപ്പിക്കില്ല. മറ്റു വസ്തുക്കളൊന്നും പരീക്ഷാ കേന്ദ്രങ്ങളില് അനുവദിക്കുകയുമില്ല. പരീക്ഷാ ഹാളില് ബാഗുകളൊന്നും അനുവദിക്കില്ല.
- പരീക്ഷാഹാളില് പ്രവേശിച്ചാലുടന് പരീക്ഷാര്ത്ഥികള് അവരുടെ നിശ്ചിത സീറ്റില് ഇരിക്കണം. സാമൂഹിക അകലം ഉറപ്പാക്കുകയും വേണം.
- പേപ്പര് രണ്ടിന് ജോമെട്രി ബോക്സ്, കളര് പെന്സിലുകള്, ക്രയോണുകള് എന്നിവ അനുവദിക്കും. വാട്ടര് കളര് അനുവദിക്കില്ല.
- ചെയ്തു നോക്കുന്നതിനായി (rough work) ബ്ലാങ്ക് പേപ്പര്, പേന/പെന്സില് എന്നിവ നല്കും. പരീക്ഷയ്ക്ക് ശേഷം ഇന്വിജിലേറ്റര്മാര്ക്ക് ഈ പേപ്പര് തിരികെ ഏല്പ്പിക്കണം. ഇതിന് മുകളിലായി പേര്, റോള് നമ്പര് എന്നിവ എഴുതിയിരിക്കുകയും വേണം.
- പരീക്ഷക്ക് മുമ്പായി തന്നെ ഫോട്ടോയും ഒപ്പും കൃത്യമായി അറ്റാച്ചു ചെയ്തിട്ടുണ്ടെന്ന് പരീക്ഷാര്ത്ഥികള് ഉറപ്പാക്കണം. തമ്പ് ഇംപ്രെക്ഷന് ഇടുമ്പോള് കൃത്യമായി ചെയ്യണം.
രക്ഷാകര്ത്താക്കള്ക്കുള്ള നിര്ദ്ദേശങ്ങള്
- പരീക്ഷയെഴുതുന്നവരെ പോലെ തന്നെ രക്ഷിതാക്കളും പാലിക്കേണ്ടതായി ചില മാര്ഗനിര്ദ്ദേശങ്ങളുണ്ട്. ഇത് എന്ടിഎ ഔദ്യോഗികമായി പ്രഖ്യാപിക്കും. ഇതില് വ്യക്തമായ ചില മാര്ഗനിര്ദ്ദേശങ്ങള് പരിശോധിക്കാം.
- പരീക്ഷയെഴുതുന്നവര്ക്കൊപ്പം രക്ഷിതാക്കള് പരീക്ഷാകേന്ദ്രത്തില് കഴിവതും വരാതിരിക്കാന് ശ്രദ്ധിക്കണം
- പരീക്ഷാ കേന്ദ്രത്തിലേക്ക് രക്ഷിതാക്കള് വരുന്നുണ്ടെങ്കില് പരീക്ഷാര്ത്ഥികളെ അവിടെ വിട്ടതിന് ശേഷം ഉടന് തന്നെ പരിസരപ്രദേശങ്ങളില് നിന്ന് മാറണം
- കേന്ദ്രങ്ങളില് ബാരിക്കേഡുകള് സ്ഥാപിക്കും. കേന്ദ്രങ്ങളില് തിരക്കുണ്ടാകാന് അനുവദിക്കില്ല
പ്രമേഹരോഗികളായ പരീക്ഷാര്ത്ഥികള്ക്കുള്ള നിര്ദ്ദേശങ്ങള്
- പ്രമേഹരോഗികളായ പരീക്ഷാര്ത്ഥികളെ ഗുളികകള്, പഴങ്ങള് (വാഴപ്പഴം/ആപ്പിള്/ഓറഞ്ച്), വാട്ടര് ബോട്ടിലുകള് (transparetn) എന്നിവയുമായി പ്രവേശിക്കാന് അനുവദിക്കും. എന്നാല് പായ്ക്ക് ചെയ്ത ചോക്ലേറ്റുകള്/കാന്ഡി/സാന്ഡ്വിച്ച് എന്നിവയുമായി പ്രവേശിക്കാന് അനുവദിക്കില്ല.