തിരുവനന്തപുരം: കളമശ്ശേരി ഗവ. മെഡിക്കല് കോളജിലെ ചികിത്സ വീഴ്ച ആരോപണം അന്വേഷിക്കാന് പ്രത്യേക ഉദ്യോഗസ്ഥനെ ചുമതലപ്പെടുത്തി. ആരോഗ്യ വിദ്യാഭ്യാസ ഡയറക്ടറേറ്റ് സ്പെഷല് ഓഫിസര് ഡോ. ഹരികുമാരന് നായര്ക്കാണ് ചുമതല. ആരോപണങ്ങള് അടിസ്ഥാനരഹിതമാണെന്ന് മുഖ്യമന്ത്രി പിണറായി വിജയന് വ്യക്തമാക്കിയതിന് പിന്നാലെയാണ് അന്വേഷണ പ്രഖ്യാപനം.
അന്വേഷണം നടത്തി ഒരാഴ്ചക്കകം റിപ്പോര്ട്ട് സമര്പ്പിക്കാനാണ് ആരോഗ്യ സെക്രട്ടറിയുടെ ഉത്തരവ്. നഴ്സിങ് ഓഫിസര് ജലജ ദേവി, ഡോ. നജ്മ എന്നിവരുടെ ആരോപണങ്ങള് അന്വേഷിക്കും. കോവിഡ് ഇതര ചികിത്സ, സേവന മികവ് എന്നിവ സംബന്ധിച്ചും അന്വേഷിക്കാന് നിര്ദേശമുണ്ട്.
ഗവ. മെഡിക്കല് കോളജില് കോവിഡ് ബാധിതനായ ഫോര്ട്ട് കൊച്ചി സ്വദേശി ഓക്സിജന് കിട്ടാതെ മരിച്ച സംഭവത്തില് നഴ്സിങ് ഓഫിസറുടെ വെളിപ്പെടുത്തല് ശരിവെച്ച് വനിത ഡോക്ടര് രംഗത്തെത്തിയിരുന്നു. മരിക്കുന്ന സമയത്ത് രോഗിയുടെ മുഖത്ത് മാസ്ക് ഉണ്ടായിരുന്നെങ്കിലും വെന്റിലേറ്റര് ഘടിപ്പിച്ചിരുന്നില്ലെന്നായിരുന്നു മെഡിക്കല് കോളജിലെ ജൂനിയര് ഡോക്ടര് വെളിപ്പെടുത്തിയത്.