കൊല്ലപ്പെട്ട എസ് എഫ് ഐ നേതാവ് അഭിമന്യുവിന് പ്രണാമമര്‍പ്പിച്ച് കോണ്‍ഗ്രസ് നേതാവിന്റെ ഭാര്യയായ കവയിത്രി ഷറഫുന്നിസയുടെ കവിത. രാഷ്ട്രീയം മറന്ന് 'അഭിമന്യു' എന്ന കവിതയ്ക്ക് അവതരണം ഡിസിസി പ്രസിഡന്റ് വക

കോഴിക്കോട്:  മഹാരാജാസ് കോളേജില്‍ എസ് എഫ് ഐ പ്രവര്‍ത്തകന്‍ അഭിമന്യു ദാരുണമായ നിലയില്‍ കൊല്ലപ്പെട്ട സംഭവത്തില്‍ അഭിമന്യുവിനെ സ്മരിച്ച് ഹൃദയസ്പര്‍ശിയായ കവിതയുമായി യുവ കോണ്‍ഗ്രസ് നേതാവിന്റെ ഭാര്യ രംഗത്ത്.

കോഴിക്കോട് ഡി സി സി പ്രസിഡന്റ് അഡ്വ. ടി സിദ്ദിഖിന്റെ ഭാര്യയും കവയിത്രിയുമായ ഷറഫുന്നിസ ടി സിദ്ദിഖാണ് യൂട്യൂബിലും മറ്റ്‌ സോഷ്യല്‍ മീഡിയ ഫോറങ്ങളിലും 'അഭിമന്യു' എന്ന പേരില്‍ കവിത പുറത്തുവിട്ടിരിക്കുന്നത്.

കവിതയ്ക്ക് മറ്റൊരു കൌതുകം കൂടിയുണ്ട്. എസ് എഫ് ഐ നേതാവിന്റെ മരണത്തില്‍ ഹൃദയസ്പര്‍ശിയായി പ്രതികരിച്ചും കൊച്ചു സഖാവിന് അഭിവാദ്യം അര്‍പ്പിച്ചും ആലപിക്കുന്ന കവിതയ്ക്ക് അവതരണം നിര്‍വഹിച്ചിരിക്കുന്നത് സാക്ഷാല്‍ കോഴിക്കോട് ഡി സി സി പ്രസിഡന്റ് സിദ്ദിഖ് തന്നെയാണ്. രാഗേഷ് ആണ് ആലാപനം.

കവിത ഓഡിയോ, വീഡിയോ രൂപങ്ങളില്‍ പുറത്ത് വിട്ടിട്ടുണ്ട്. മുമ്പ് കോണ്‍ഗ്രസ് നേതാവ് ഷുഹൈബിന്റെ മരണശേഷവും സമാന രീതിയില്‍ ഷറഫുന്നിസ കവിത പുറത്തുവിട്ടിരുന്നു. സമകാലികരായ കവികളില്‍ ഏറ്റവും ശ്രദ്ധേയയായ എഴുത്തുകാരിയാണ് ഷറഫുന്നിസ. നൂറുകണക്കിന് കവിതകളാണ് ഇവരുടെതായി പുറത്തുവന്നിട്ടുള്ളത്.