ഫ്രാങ്കോ മുളക്കലിനെ അറസ്റ്റ് ചെയ്തതില്‍ സന്തോഷമുണ്ടെന്ന് സമരം ചെയ്യുന്ന കന്യാസ്ത്രീകള്‍

കൊച്ചി:  ഫ്രാങ്കോ മുളക്കലിന്‍റെ അറസ്റ്റ് വിവരമറിഞ്ഞ് കന്യാസ്ത്രീകളുടെ സമരപന്തലില്‍ ആഹ്ലാദപ്രകടനം. ഫ്രാങ്കോയെ അറസ്റ്റ് ചെയ്തതില്‍ സന്തോഷമുണ്ടെന്ന് സമരം ചെയ്യുന്ന കന്യാസ്ത്രീകള്‍ മാധ്യമങ്ങളോട് പറഞ്ഞു‍.

അറസ്റ്റ് പ്രഹസനമാവരുതെന്നും നിയമനടപടി കര്‍ശനമാക്കണമെന്നും കന്യാസ്ത്രീകള്‍ പറഞ്ഞു‍. സഭയ്ക്ക് അകത്തുനിന്നും പിന്തുണ ലഭിച്ചിട്ടില്ല. സഭയില്‍ നിന്ന് നീതി ലഭിക്കാത്തതിനാലാണ് സമരത്തിനിറങ്ങിയത് എന്നും കന്യാസ്ത്രീകള്‍ പറഞ്ഞു.

എന്നാല്‍ കന്യാസ്ത്രീ സമരത്തെ സര്‍ക്കാര്‍ ഇപ്പോഴും ശരിയായി മനസിലാക്കുന്നില്ലെന്ന് സിസ്റ്റര്‍ അനുപമ മാധ്യമങ്ങളോട് പറഞ്ഞു. സമരം സഭക്കെതിരെയല്ല നടത്തുന്നത്. എല്ലാ സ്ത്രീകള്‍ക്കും വേണ്ടിയുള്ള സമരമാണെന്നും സിസ്റ്റര്‍ പറഞ്ഞു. സഭയില്‍ നിന്നു ഇങ്ങനെ ഒരു നിലപാട് പ്രതീക്ഷിച്ചില്ലെന്നും സിസ്റ്റര്‍ അനുപമ പറഞ്ഞു.

ഒപ്പം നിന്ന മാധ്യമങ്ങളോട് കന്യാസ്ത്രീകള്‍ നന്ദി പറ‍ഞ്ഞു. കന്യാസ്ത്രീകളുടെ സമരം ഇന്ന് പതിനാലാം ദിവസത്തിലേയ്ക്ക് എത്തി നില്‍ക്കുമ്പോഴാണ് ഫ്രാങ്കോ മുളക്കലിന്‍റെ അറസ്റ്റ്.