മലപ്പുറം ജില്ലയിൽ ഒരു ദിവസം കൊവിഡ് ബാധിതരാകുന്നവരുടെ എണ്ണം 800 കടന്നു: ജാ​ഗ്രത പാലിക്കാൻ നിർദ്ദേശം

മലപ്പുറം: ജില്ലയിൽ ഇതാദ്യമായി ഒരു ദിവസം കൊവിഡ് ബാധിതരാകുന്നവരുടെ എണ്ണം 800 കടന്നു. രണ്ട് ദിവസം തുടർച്ചയായി 700ൽപ്പരം രോഗബാധിതർ റിപ്പോർട്ട് ചെയ്തതിനു പിറകെയാണ് ഇന്ന് ജില്ലയിൽ 826 പേർക്ക് രോഗബാധ സ്ഥരീകരിച്ചിരിക്കുന്നതെന്ന് ജില്ലാ കളക്ടർ കെ. ഗോപാലകൃഷ്ണൻ അറിയിച്ചു. ജില്ലയിൽ കൊവിഡ് ബാധ സ്ഥിരീകരിക്കുന്നതിൽ ഏറ്റവും ഉയർന്ന പ്രതിദിന കണക്കാണിത്.

ആശങ്കാജനകമായ സ്ഥിതിവിശേഷമാണ് കൊവിഡ് വ്യാപനത്തിൽ ജില്ലയിലുള്ളത്. ഈ ഘട്ടത്തിൽ ആരോഗ്യ ജാഗ്രത കർശനമായി പാലിക്കാൻ പൊതുജനങ്ങൾ തയ്യാറാകണമെന്നും ഇക്കാര്യത്തിൽ ഉപേക്ഷ പാടില്ലെന്നും കളക്ടർ ആവർത്തിച്ച് വ്യക്തമാക്കി. നേരിട്ടുള്ള സമ്പർക്കത്തിലൂടെ 756 പേർ രോഗബാധിതരായപ്പോൾ ഉറവിടമറിയാതെ 41 പേർക്കും ഇന്ന് കൊവിഡ് 19 സ്ഥിരീകരിച്ചു.

നേരിട്ടുള്ള സമ്പർക്കത്തിന് പുറമെ ഉറവിടമറിയാതെ രോഗം ബാധിക്കുന്നവരുടെ എണ്ണത്തിലും വർദ്ധവുണ്ടാകുന്നത് ആശങ്കയുളവാക്കുന്നുണ്ട്. സർക്കാരിന്റെയും ആരോഗ്യ പ്രവർത്തകരുടെയും നിർദേശങ്ങൾ പാലിക്കുന്നതിൽ വീഴ്ച വരുത്തുന്നവർക്കെതിരെ കർശന നടപടികൾ സ്വീകരിക്കുമെന്ന് കളക്ടർ അറിയിച്ചു. അഞ്ച് ആരോഗ്യ പ്രവർത്തകർക്കും ഇന്ന് കൊവിഡ് 19 സ്ഥിരീകരിച്ചു.