മന്ത്രിമോഹികളുടെ ബാഹുല്യം കര്‍ണ്ണാടകയില്‍ കോണ്‍ഗ്രസിനെയും ജെഡിഎസിനെയും കുഴയ്ക്കുന്നു ! 100 കോടിയും മന്ത്രിസ്ഥാനവും വേണ്ടെന്നു വച്ചതിന് പകരം ആഭ്യന്തര വകുപ്പ് തന്നെ വേണമെന്ന് എംഎല്‍എമാര്‍ ! തിങ്കളാഴ്ച പുതിയ മന്ത്രിമാര്‍ സത്യപ്രതിജ്ഞ ചെയ്തേക്കും

ബാംഗ്ലൂര്‍:  കര്‍ണ്ണാടകയില്‍ കുമാരസ്വാമി സര്‍ക്കാര്‍ അധികാരമേറ്റെങ്കിലും മന്ത്രിമാരെ നിശ്ചയിക്കുന്നതില്‍ കോണ്‍ഗ്രസിലും ജെ ഡി എസിലും തര്‍ക്കം മുറുകുന്നു. കോണ്‍ഗ്രസിന് 22 ഉം ജെ ഡി എസിന് 12 ഉം വീതമാണ് മന്ത്രിസ്ഥാനങ്ങള്‍ പങ്കുവച്ചിരിക്കുന്നത്.

എന്നാല്‍ മന്ത്രിസ്ഥാന മോഹികളുടെ ബാഹുല്യം ഇരു പാര്‍ട്ടികളെയും വലയ്ക്കുകയാണ്.  78 ല്‍ നിന്നും 22 പേരെ (+സ്പീക്കര്‍) മന്ത്രിസ്ഥാനത്തേക്ക് തെരഞ്ഞെടുക്കുകയെന്നത് കോണ്‍ഗ്രസിനും 37 പേരില്‍ നിന്ന് 12 പേരെ (+ ഡെപ്യൂട്ടി സ്പീക്കര്‍) തെരഞ്ഞെടുക്കുകയെന്നത് ദളിനും ശ്രമകരമായ ദൌത്യം തന്നെയാണ്. കാരണം ഇവരില്‍ ഓരോ എം എല്‍ എയ്ക്കും 100 കോടിയും പ്രമുഖ വകുപ്പോടുകൂടി മന്ത്രിസ്ഥാനവും ബി ജെ പി വാഗ്ദാനം ചെയ്തതാണ്.

ആ ഓഫര്‍ നിരസിച്ച പാര്‍ട്ടിക്കൊപ്പം നിന്ന തങ്ങള്‍ക്ക് മാന്യമായ പരിഗണന തന്നെ നല്‍കണമെന്നാണ് എം എല്‍ എമാരുടെ ആവശ്യം. രണ്ടു പാര്‍ട്ടികളും പത്ത് വീതം എം എല്‍ എമാര്‍ ആഭ്യന്തര വകുപ്പിനായി സമ്മര്‍ദ്ദം തുടങ്ങിയിട്ടുണ്ട്. ആ വകുപ്പ് ഏത് പാര്ട്ടിക്കെന്നു പോളും തീരുമാനമായിട്ടുമില്ല.

ധനവകുപ്പ് മുഖ്യമന്ത്രി തന്നെ കൈവശം വയ്ക്കുകയാണെങ്കില്‍ ആഭ്യന്തരം കോണ്‍ഗ്രസിന് ലഭിക്കും. ഈ വകുപ്പ് ഉപമുഖ്യമന്ത്രി പരമേശ്വരമോ ഡി കെ ശിവകുമാറോ ഏറ്റെടുക്കാനാണ് സാധ്യത.

കോണ്‍ഗ്രസില്‍ നിന്ന് മലയാളിയും മുന്‍ ആഭ്യന്തര മന്ത്രിയുമായ കെ ജി ജോര്‍ജ്ജ് മന്ത്രിയാകുമെന്ന് ഉറപ്പായിട്ടുണ്ട്. മലയാളികളായ യു ടി ഖാദറിന്റെ പേരും മന്ത്രിസ്ഥാനത്തേക്ക് പരിഗണിക്കുന്നുണ്ട്. വെള്ളിയാഴ്ചയാണ് വിശ്വാസ വോട്ടെടുപ്പ്.

നിലവില്‍ മുഖ്യമന്ത്രിയും ഉപമുഖ്യമന്ത്രിയും മാത്രമാണ് സത്യപ്രതിജ്ഞ ചെയ്തിട്ടുള്ളത്. തിങ്കളാഴ്ചയെങ്കിലും സമ്പൂര്‍ണ്ണ മന്ത്രിസഭ അധികാരമേല്‍ക്കണമെന്ന നിലയിലാണ് ചര്‍ച്ചകള്‍ പുരോഗമിക്കുന്നത്.  മാത്രമല്ല, സംസ്ഥാനത്ത് ഭരണ സ്തംഭനവും തുടരുകയാണ്.