ദുബായില്‍ 'സ്പാരോ ആർട്ട് എക്സിബിഷൻ' ആരംഭിച്ചു

ദുബായ്:  അബുദാബി ആസ്ഥാനമായ ആർട്ട് യുഎഇ , ഓട്ടിസം ട്രസ്റ്റ് ഫൗണ്ടേഷനും ഗ്ലോബൽ ആർട്ട് ഫൗണ്ടേഷനുമായി സഹകരിച്ചുകൊണ്ട് ആഗസ്ത് ഒന്ന് മുതൽ പതിനഞ്ച് വരെ 'സ്പാരോ ആർട്ട് എക്സിബിഷൻ' ദുബായ് ഷെയ്ഖ് സായിദ് റോഡിലെ ഷെൻഗറില ഹോട്ടലിൽ ആരംഭിച്ചു.

ഓട്ടിസം അസുഖ ബാധിതനായ പതിനഞ്ച് വയസ്സുകാരൻ അമാൻ കൃഷ്ണ എന്ന പാലക്കാട്ടുകാരൻ വരച്ച ചിത്രങ്ങളാണ് പ്രദർശിപ്പിക്കുന്നത്. ചെറുപ്പം മുതലേ പെയിന്റിങ്ങിലും സംഗീതത്തിലും ശ്രദ്ധ കാണിച്ചുതുടങ്ങിയ അമാൻ ഇന്നിപ്പോൾ ലോകനിലവാരത്തിലുള്ള ചിത്രങ്ങളാണ് വരച്ചു തീർത്തിരിക്കുന്നത്.

ആരോടും അധികം സംസാരിക്കാതെ തന്റെ പെയിന്റിങ് ബ്രഷും ക്യാൻവാസും എപ്പോഴും കൂടെക്കൂട്ടി ചിത്രങ്ങളിൽ മാത്രം സമയം ചിലവഴിക്കുന്ന അമാന് ന്യുയോർക്ക് യൂണിവേഴ്‌സിറ്റിയിൽ നിന്നും ലണ്ടൻ യൂണിവേഴ്‌സിറ്റിയിൽ നിന്നും ക്ഷണം ലഭിച്ചു കഴിഞ്ഞു.

ഹിസ് ഹൈനസ്സ് ഷെയ്ഖ് ഹംദാൻ ബിൻ മുഹമ്മദ് അൽ നഹ്യാനും , ലണ്ടൻ ആർട്ട് & മീഡിയ ഫൗണ്ടേഷൻ ചെയർ പേഴ്സണുമായ ഡോക്ടർ എലേനയും മുഖ്യാതിഥികൾ ആയ ചടങ്ങിൽ ഓട്ടിസം ട്രസ്റ്റ് ഫൗണ്ടേഷൻ ചെയർമാൻ ഹിസ് എക്‌സലൻസി ഷെയ്ഖ് ഫഹദും ആർട്ടിസ്റ്റ് അമനും ചേർന്നുകൊണ്ട് ഉത്‌ഘാടനം നിർവഹിച്ചു.

ഷെയ്ഖ് സായിദ് റോഡിൽ ഷെൻഗറില ഹോട്ടലിലെ 43 ആം നിലയിലുള്ള പ്രസിഡൻഷ്യൽ സ്യുട്ടിൽ വെച്ചായിരുന്നു ചടങ്ങുകൾ സംഘടിപ്പിച്ചത്. അബുദാബിയിലെ എ. ഇ. ക്യാപ്പിറ്റൽ സി ഇ ഓ ആദം ലഡ്‌ജാജ് , ബീവർ ഗൾഫ് ചെയർമാൻ രാജേഷ് കൃഷ്ണ , ഗ്ലോബൽ ആർട്ട് അംബാസിഡർ കിംബർലി മാക്ക് ഗോവൻ , സിനാർ ചെയർമാൻ അഹമ്മദ് സിനാർ , ഗ്ലോബൽ ലക്ഷ്വറി കൗൺസിൽ സി ഇ ഓ സോഫി ജിൻഡ , ടോണിനോ ലബോര്ഗിനി പാർട്ണർ ഉസ്മാൻ , ശങ്കറില ഹോട്ടൽ ജനറൽ മാനേജർ നിക്കോളാസ് എന്നിവർ ചടങ്ങിൽ സംബന്ധിച്ചു.

തുർക്കിയിലെ പ്രശസ്തസംഗീത ബാൻഡിന്റെ ഔദ് സംഗീതവും ചിത്രങ്ങളുടെ ലേലവും ഉണ്ടായിരുന്നു . ചിത്രങ്ങൾ വിറ്റു കിട്ടുന്ന പണം ഓട്ടിസം ട്രസ്റ്റ് ഫൗണ്ടേഷന് നൽകുമെന്ന് ആർട്ട് യു എ ഇ സ്ഥാപകരായ സത്താർ അൽ കരനും സക്കരിയ്യ മുഹമ്മദും വാർത്താക്കുറിപ്പിൽ അറിയിച്ചു.