New Update
ന്യൂഡല്ഹി: വരുന്ന ലോക്സഭാ തെരഞ്ഞെടുപ്പില് റായ്ബറേലിയില് സോണിയാഗാന്ധിക്ക് പകരം മകള് പ്രിയങ്കാ ഗാന്ധിയെ പരിഗണിക്കാന് കോണ്ഗ്രസ് ഗൌരവപൂര്വ്വം ആലോചിക്കുന്നു. യുപിയില് പ്രതിപക്ഷ മുന്നേറ്റത്തിനു പ്രിയങ്കയുടെ സാന്നിധ്യം ഗുണംചെയ്യുമെന്ന വിലയിരുത്തലിലാണ് തീരുമാനം.
ആരോഗ്യ പ്രശ്നങ്ങള് മൂലമാണ് സോണിയാ ഗാന്ധി തനിക്ക് പകരം മകള് പ്രിയങ്കയെ മത്സരിപ്പിക്കാന് ഒരുങ്ങുന്നത്. കഴിഞ്ഞ ഏതാനും വര്ഷങ്ങളായി മണ്ഡലത്തിലെ കാര്യങ്ങള് കൈകാര്യം ചെയ്യുന്നത് പ്രിയങ്കയാണ്. ഇതോടെ പ്രിയങ്കയുടെ രാഷ്ട്രീയ പ്രവേശനവുമായി ബന്ധപ്പെട്ട് കോണ്ഗ്രസില് നിലനിന്നിരുന്ന അനിശ്ചിതത്വത്തിനും പരിഹാരമാവുകയാണ് .
അതേസമയം കോണ്ഗ്രസ് പ്രസിഡന്റ് രാഹുല്ഗാന്ധി ഉത്തര്പ്രദേശിലെ അമേഠിയില് നിന്നുതന്നെ വീണ്ടും മത്സരിക്കാനും തീരുമാനമായി . റായ്ബറേലിയില്നിന്ന് സോണിയാഗാന്ധി വീണ്ടും മത്സരിക്കുമോ എന്നകാര്യത്തില് പാര്ട്ടി തീരുമാന൦ വൈകിപ്പിക്കുകയാണ്. അതിനിടെ, ശിവസേനയുമായി കോണ്ഗ്രസ് തെരഞ്ഞെടുപ്പ് സഖ്യം ഉണ്ടാക്കില്ലെന്നും പാര്ട്ടി വൃത്തങ്ങള് വ്യക്തമാക്കി.
അമേഠി ലോക്സഭാ മണ്ഡലത്തില് നിന്ന് തുടര്ച്ചയായ നാലാം തവണയാണ് രാഹുല് ഗാന്ധി മത്സരിക്കാനൊരുങ്ങുന്നത്. 2004 ല് ആയിരുന്നു രാഹുല് ആദ്യമായി അമേഠിയില് നിന്ന് ജനവിധി തേടിയത്. നെഹ്രു കുടുംബത്തിന്റെ സ്വന്തം മണ്ഡലമായാണ് അമേഠി വിലയിരുത്തപ്പെടുന്നത്.
രാഹുലിന്റെ കുടുംബത്തില് നിന്ന് ഇതുവരെ നാലുപേര് ഈ മണ്ഡലത്തില് ജനവിധി തേടിയിട്ടുണ്ട്. സഞ്ജയ് ഗാന്ധി, രാജീവ് ഗാന്ധി, സോണിയ ഗാന്ധി, രാഹുല് ഗാന്ധി എന്നിവരാണ് ഈ മണ്ഡലത്തില് നിന്ന് ജനവിധി തേടിയ നെഹ്റു കുടുംബാഗംങ്ങള്.
മധ്യപ്രദേശ്, ഛത്തീസ്ഗഢ്, രാജസ്ഥാന് എന്നിവിടങ്ങളില് മുന്കൂട്ടി മുഖ്യമന്ത്രി സ്ഥാനാര്ത്ഥികളെ പ്രഖ്യാപിക്കാതെ തെരഞ്ഞെടുപ്പിനെ നേരിടാനാണ് കോണ്ഗ്രസ് തീരുമാനം.