വാഷിങ്ങ്ടന് : ഇതാദ്യമായാണ് അമേരിക്കൻ സെനറ്റിന്റെ വാതിൽ ഒരു കുട്ടിക്കുമുന്നിൽ തുറക്കപ്പെട്ടത്. അതും വെറും 10 ദിവസം മാത്രം പ്രായമുള്ള പിഞ്ചു കുഞ്ഞിനു മുന്നില്. അപ്പോള് ചരിത്രം വഴിമാറുകയായിരുന്നു; സെനറ്റർ ടാമി ഡക്വർത്തിനും അവരുടെ ഓമനക്കുട്ടിക്കും മുന്നിൽ.
അമേരിക്കൻ പ്രസിഡന്റ് ട്രംപിന്റെ നാസ ഭരണാധികാരിയുമായി ബന്ധപ്പെട്ട നിർദേശത്തിനെതിരെ വോട്ടുചെയ്യാൻ വനിതാ സെനറ്റർ ടാമി ഡക്വർത്താണ് സ്വന്തം മകളെയുമായി ഇക്കഴിഞ്ഞദിവസം യുഎസ് സെനറ്റ് ഹൗസിലേക്കു നടന്നുകയറിയത്.
കൈയടിച്ചും ആരവങ്ങളുയർത്തിയായിരുന്നു മറ്റു വനിതാ സെനറ്റർമാർ അമ്മയെയും ചരിത്രത്തില് ഇടം നേടിയ ആ കുഞ്ഞിനേയും സ്വീകരിച്ചത് .
അമേരിക്കൻ സെനറ്റർമാർക്കു യൂണിഫോം ഉണ്ട്. ഒരുഘട്ടത്തിലും അത് അംഗങ്ങളാരും തെറ്റിക്കാറില്ല. 10 ദിവസമേ പ്രായമുള്ളൂവെങ്കിലും ഡക്വർത്തിന്റെ കുട്ടി യൂണിഫോം നിയമം തെറ്റിച്ചില്ല.
ബ്ലെയ്സർ ധരിച്ചുകൊണ്ടുതന്നെയായിരുന്നു പ്രവേശനം; സെനറ്റ് അക്കാര്യത്തിൽ നിർബന്ധം പിടിച്ചില്ലെങ്കിലും. മെയ്ൽ ബൗൾസ്ബേ എന്നാണു ഡക്വർത്തിന്റെ മകളുടെ പേര്.
ആരും ലംഘിക്കാൻ ധൈര്യപ്പെടാത്ത കർശന നിയമങ്ങളും ആചാരങ്ങളുമുണ്ട് യു എസ് സെനറ്റിന് . നവജാത ശിശുക്കൾക്കു പ്രവേശനം നിഷേധിച്ചിരുന്നതും ഈ നിയമങ്ങളുടെ ഭാഗമാണ് .
എന്നാല് വനിതാ സെനറ്റർമാരുടെ അംഗസംഖ്യ കൂടിയതിന്റേയും നിയമനിർമാണത്തിൽ വനിതകളുടെ സ്വാധീനശക്തിവർധിച്ചതിന്റേയും ഫലമാണ് ഇപ്പോഴത്തെ മാറ്റം.
കുട്ടികളെ അമ്മമാർക്കൊപ്പം സെനറ്റിൽ പ്രവേശിപ്പിക്കാൻ കഴിഞ്ഞ ദിവസമാണ് തീരുമാനിച്ചത് . ഒരുവയസ്സിൽ താഴെയുള്ള കുട്ടികളെ അവരുടെ അമ്മമാർക്ക് ഓഫിസിൽ കൊണ്ടുവരാമെന്നായിരുന്നു തീരുമാനം .
കഴിഞ്ഞ ജനുവരിയിൽത്തന്നെ ഡക്വർത്ത് താൻ ഗർഭിണിയാണെന്നു സെനറ്റിനെ അറിയിച്ചിരുന്നു. അന്നുമുതൽതന്നെ കുട്ടികളുമായി സെനറ്റർമാർക്ക് ഓഫിസിൽ വരാമോ എന്ന കാര്യത്തിൽ ചർച്ചയും തുടങ്ങിയിരുന്നു . വ്യാഴാഴ്ച മകളുമായി സെനറ്റിലേക്കു കയറുംമുമ്പ് ഡക്വർത്ത് സഹപ്രവർത്തകർക്കു നന്ദി പറഞ്ഞു.