മധ്യപ്രദേശിലെ ഭിന്ദ് ജില്ലയില്‍ ജയിലിലെ മതിൽ ഇടിഞ്ഞുവീണു, 22 തടവുകാർക്ക് ഗുരുതര പരിക്ക്

ഭിന്ദ്: മധ്യപ്രദേശിലെ ഭിന്ദ് ജില്ലയിലെ ജയിലിലെ ഒരു ബാരക്കിന്റെ മതിൽ ശനിയാഴ്ച പുലർച്ചെ ഇടിഞ്ഞുവീണ് 22 തടവുകാർക്ക് ഗുരുതരമായി പരിക്കേറ്റതായി ഒരു ഉദ്യോഗസ്ഥൻ പറഞ്ഞു.

ബാരക്ക് നമ്പർ 6 ന്റെ മതിൽ പുലർച്ചെ 5.10 ഓടെ തകര്‍ന്നു വീഴുകയായിരുന്നുവെന്ന്‌ ഭിന്ദ് പോലീസ് സൂപ്രണ്ട് മനോജ് കുമാർ സിംഗ് പിടിഐയോട് പറഞ്ഞു.  "ഇരുപത്തിരണ്ട് തടവുകാർക്ക് സംഭവത്തിൽ പരിക്കേറ്റു.

ഗുരുതരമായ പരിക്കേറ്റ ഒരു തടവുകാരനെ ഗ്വാളിയറിലേക്ക് ചികിത്സയ്ക്കായി കൊണ്ടുപോയി, മറ്റ് പരിക്കേറ്റ തടവുകാരെ ജില്ലാ ആശുപത്രിയിൽ പ്രവേശിപ്പിച്ചു," അദ്ദേഹം പറഞ്ഞു. സംഭവസമയത്ത് ജയിലിനുള്ളിൽ 255 തടവുകാർ ഉണ്ടായിരുന്നു, അദ്ദേഹം കൂട്ടിച്ചേർത്തു.

"ഞങ്ങൾക്ക് വിവരം ലഭിച്ചയുടൻ രക്ഷാപ്രവർത്തനത്തിനായി പോലീസ് ഉദ്യോഗസ്ഥരെ ജയിലിലേക്ക് കൊണ്ടുപോയി," സിംഗ് പറഞ്ഞു. ജയിൽ കെട്ടിടം വളരെ പഴയതാണെന്നും കഴിഞ്ഞ രണ്ട് ദിവസമായി തുടർച്ചയായി പെയ്യുന്ന മഴയുടെ ഫലമായി മതിൽ ഇടിഞ്ഞുവീഴാൻ സാധ്യതയുണ്ടെന്നും പോലീസ് ഉദ്യോഗസ്ഥൻ പറഞ്ഞു.