അലഹാബാദ്: വിവാഹിതനായ മകന് ആശ്രിത നിയമനത്തിന് അര്ഹതയുണ്ടങ്കില്, വിവാഹിതയെന്ന കാരണത്താല് മാത്രം മകള്ക്ക് അര്ഹത നിഷേധിക്കാനാവില്ലെന്ന് അലഹാബാദ് ഹൈക്കോടതി. വിവാഹിതരായ പെണ്മക്കള്ക്കും ആശ്രിത നിയമനത്തിന് അര്ഹതയുണ്ടെന്ന് ജസ്റ്റീസ് ജെ.ജെ. മുനിര് വ്യക്തമാക്കി.
വിവാഹിതയായ മകള്ക്ക് നിയമനം നല്കുന്നത് യുപിയിലെ ആശ്രിത നിയമന നിയമത്തിന്റെ ലംഘനമാകുമെന്ന വിദ്യാഭ്യാസ വകുപ്പിന്റെ വാദത്തെ തള്ളിക്കൊണ്ടാണ് കോടതി ഇക്കാര്യം വ്യക്തമാക്കിയത്.
പിതാവ് മരിച്ചതിനാലുള്ള ആശ്രിത നിയമത്തിനു നല്കിയ അപേക്ഷ തള്ളിക്കളഞ്ഞ വിദ്യാഭ്യാസ വകുപ്പിന്റെ നടപടിക്കെതിരെ മഞ്ജുള് ശ്രീവാസ്തവ നല്കിയ ഹര്ജിയിലാണ് നടപടി. വിവാഹിതരായ പെണ്മക്കളെ നിയമന ചട്ടങ്ങളില് 'കുടുംബം' എന്നതിന്റെ നിര്വചനത്തില് ഒഴിവാക്കിയത് ഭരണഘടനയുടെ 14,15 വകുപ്പുകളുടെ ലംഘനമാണെന്ന് അലഹാബാദ് ഹൈക്കോടതി ഡിവിഷന് ബെഞ്ച് 2015 ല് വ്യക്തമാക്കിയിട്ടുണ്ടെന്നും ജസ്റ്റീസ് മുനിര് വിശദീകരിച്ചു.