ഡൽഹി: രാജ്യ തലസ്ഥാനത്ത് കൊലവിളി പ്രസംഗം നടത്തി കേന്ദ്ര സഹമന്ത്രി അനുരാഗ് താക്കൂർ. ഡൽഹിയിലെ തെരഞ്ഞെടുപ്പ് പ്രചാരണത്തിലാണ് കേന്ദ്ര ധനകാര്യ സഹമന്ത്രിയായ അനുരാഗ് താക്കൂറിന്റെ വിവാദ പ്രസംഗം. രാജ്യത്തെ ഒറ്റുകാർക്ക് നേരേ വെടിവയ്ക്കാനായിരുന്നു കേന്ദ്രമന്ത്രിയുടെ യോഗത്തിലെ മുദ്രാവാക്യം.
രാജ്യത്തെ ഒറ്റുന്നവർക്കെതിരേ എന്ന് ആഹ്വാനം ചെയ്ത താക്കൂർ, പ്രവർത്തകരെക്കൊണ്ട് "വെടിവയ്ക്കൂ’ മുദ്രാവാക്യം ഏറ്റുവിളിപ്പിക്കുകയും ചെയ്തു.
പ്രസംഗത്തിന്റെ വീഡിയോ ട്വിറ്ററിൽ വൈറലായി. ’ദേശ് കെ ഗദ്ദറോണ്’....എന്ന് താക്കൂർ വിളിക്കുകയും ’ഗോലി മാരോ സാലോണ് കോ’ എന്ന് പ്രവർത്തകരെക്കൊണ്ട് വിളിപ്പിക്കുകയുമായിരുന്നു. മുതിർന്ന നേതാവ് ഗിരിരാജ് സിംഗിന്റെ സാന്നിധ്യത്തിലായിരുന്നു കേന്ദ്രമന്ത്രിയുടെ ആഹ്വാനം.