അബുദാബി : 17-ാമത് എ.എഫ്.സി കപ്പിന് നാളെ യു.എ.ഇയില് തുടക്കമാകും. നാല് നഗരങ്ങളിലെ എട്ട് വേദികളിലായി നടക്കുന്ന ടൂര്ണമെന്റില് 24 ടീമുകളാണ് ഏഷ്യയിലെ ഫുട്ബാള് ചാമ്പ്യന്മാരാകാന് മാറ്റുരയ്ക്കുന്നത്.
നാളെ അബുദാബി സെയ്ദ് സ്പോര്ട്സ് സിറ്റി സ്റ്റേഡിയത്തില് ആതിഥേയരായ യുണൈറ്റഡ് അറബ് എമിറേറ്റ്സും ബഹ്റിനും തമ്മിലാണ് ആദ്യ മത്സരം. 2011നുശേഷം ആദ്യമായി എ.എഫ്.സി കപ്പിന് യോഗ്യത നേടിയ ഇന്ത്യന് ടീമിന് ആദ്യ മത്സരം തായ്ലന്ഡിനെതിരെ ഞായറാഴ്ചയാണ്. ഈ മാസം 10ന് യു.എ.ഇ, 14ന് ബഹ്റിന് എന്നിവര്ക്കെതിരെയാണ് ഗ്രൂപ്പ് റൗണ്ടിലെ ഇന്ത്യയുടെ മറ്റ് മത്സരങ്ങള്.
നാല് ടീമുകള് വീതമടങ്ങുന്ന ആറ് ഗ്രൂപ്പുകളാണ് പ്രാഥമിക റൗണ്ടിലുള്ളത്. ഓരോ ഗ്രൂപ്പിലെ ആദ്യ രണ്ട് സ്ഥാനക്കാരും മികച്ച നാല് മൂന്നാം സ്ഥാനക്കാരുമാണ് പ്രീക്വാര്ട്ടര് റൗണ്ടിലെത്തുന്നത്. ഈ മാസം 20 മുതലാണ് പ്രീക്വാര്ട്ടര് മത്സരങ്ങള്തുടങ്ങുന്നത്. ക്വാര്ട്ടര് ഫൈനലുകള് 24, 25 തീയതികളിലും സെമിഫൈനല് 28, 29 തീയതികളിലും നടക്കും. ഫെബ്രുവരി ഒന്നിന് സായെദ് സ്പോര്ട്സ് സിറ്റി സ്റ്റേഡിയത്തിലാണ് ഫൈനല്.
2011ല് ഗ്രൂപ്പ് റൗണ്ടിലെ ഒറ്റ മത്സരംപോലും ജയിക്കാതെ ഇന്ത്യ പുറത്താവുകയായിരുന്നു. എന്നാല്, ഇത്തവണ അത്ഭുതങ്ങള് സൃഷ്ടിക്കാനുള്ള തയ്യാറെടുപ്പിലാണ് സ്റ്റീഫന് കോണ്സ്റ്റന്റൈന് പരിശീലിപ്പിക്കുന്ന ഇന്ത്യന് സംഘം. സുനില് ഛെത്രിയാണ് നായകന്. രണ്ട് മലയാളികള് ടീമിലുണ്ട്. അനസ് എടത്തൊടികയും ആഷിഖ് കുരുണിയനും.
ഗ്രൂപ്പ് എ
യു.എ.ഇ
തായ്ലന്ഡ്
ഇന്ത്യ
ബഹ്റിന്
ഗ്രൂപ്പ് ബി
ആസ്ട്രേലിയ
സിറിയ,
പാലസ്തീന്,
ജോര്ദാന്
ഗ്രൂപ്പ് സി
ദക്ഷിണ കൊറിയ
ചൈന
കിര്ഗിസ്ഥാന്
ഫിലിപ്പീന്സ്
ഗ്രൂപ്പ് ഡി
ഇറാന്
ഇറാഖ്
വിയറ്റ്നാം
യെമന്
ഗ്രൂപ്പ് ഇ
സൗദി അറേബ്യ
ഖത്തര്
ലബനന്
നോര്ത്ത് കൊറിയ
ഗ്രൂപ്പ് എഫ്
ജപ്പാന്
ഉസ്ബഖിസ്ഥാന്
ഒമാന്
തുര്ക്ക്മെനിസ്ഥാന്