സ്വവർഗ വിവാഹങ്ങൾക്കും ഗർഭച്ഛിദ്രത്തിനും ദൈവം നൽകിയ വിധിയാണ് കാട്ടുതീ : വിവാദ പരാമര്‍ശവുമായി ഓസ്ട്രേലിയൻ റഗ്ബി താരം

സിഡ്നി : സ്വവർഗ പ്രണയത്തെക്കുറിച്ച് വീണ്ടും വിവാദ പരാമർശങ്ങളുമായി ഓസ്ട്രേലിയയിലെ പ്രമുഖ റഗ്ബി താരം. സ്വവർഗ രതിയും ഗർഭച്ഛിദ്രവും നിയമവിധേയമാക്കിയതാണ് ഓസ്ട്രേലിയയിൽ രൂക്ഷമായ കാട്ടുതീയ്ക്ക് ഇടയാക്കിയതെന്ന റഗ്ബി താരം ഇസ്രായേൽ ഫോലാവൂവിന്റെ പരാമര്‍ശമാണ് ഇപ്പോൾ വിവാദങ്ങൾക്കിടയാക്കിയിരിക്കുന്നത്.

സ്വവർഗ വിവാഹങ്ങൾക്കും ഗർഭച്ഛിദ്രത്തിനും ദൈവം നൽകിയ വിധിയാണ് കാട്ടുതീ എന്നായിരുന്നു ഫേലാവൂന്റെ പ്രസ്താവന. ട്രൂത്ത് ഓഫ് ജീസസ് ക്രെസ്റ്റ് ചർച്ച് സിഡ്നിയുടെ സോഷ്യൽ മീഡിയ പേജിൽ പോസ്റ്റ് ചെയ്ത ഒരു വീഡിയോ സന്ദേശത്തിലാണ് ഇത്തരം വിവാദ പരാമർശങ്ങൾ.

'കാട്ടുതീയും വരൾച്ചയും എത്ര വേഗമാണ് വരുന്നതെന്ന് നോക്കു.. ഇത് യാദൃശ്ചികമാണെന്നാണോ കരുതുന്നത്.. ദൈവം നിങ്ങളോട് സംസാരിക്കുകയാണ്.. നിങ്ങൾ പശ്ചാത്തപിക്കു ഓസ്ട്രേലിയ..' എന്നായിരുന്നു വാക്കുകൾ.

വീഡിയോ വൈറലായതോടെ ഓസ്ട്രേലിയൻ പ്രസിഡന്റ് സ്കോട്ട് മോറിസൻ അടക്കമുള്ളവർ ഫോലാവൂനെതിരെ രംഗത്തെത്തിയിട്ടുണ്ട്. സ്വന്തം അഭിപ്രായങ്ങൾ പറയാൻ ഫോലാവൂവിന് അവകാശമുണ്ടെങ്കിലും അത് തീയിൽ വീടുകൾ അടക്കം കത്തിനശിച്ച ആളുകളോട് അനാദരവ് കാട്ടിക്കൊണ്ടാകരുതെന്നായിരുന്നു അദ്ദേഹത്തിന്റെ പ്രതികരണം.

ക്രിസ്തീയ വിശ്വാസികളായ ഒട്ടേറെ ഓസ്‌ട്രേലിയക്കാരെ വേദനിപ്പിക്കുന്ന പരാമർശമാണിതെന്നും, അവരുടെ നിലപാട് ചിലപ്പോൾ ഇതായിരിക്കണമെന്നില്ലെന്നും പ്രധാനമന്ത്രി കൂട്ടിച്ചേർത്തു.