ബച്ചൻ കുടുംബവും പ്രത്യേകിച്ച് ജയാ ബച്ചനും മുന് നായിക രേഖയുമായുള്ള പിണക്കം ബോളിവുഡില് ഏറ്റവും പ്രശസ്തമാണ് . എന്നാല് ആ പിണക്കം മാറ്റാനുള്ള ചില നീക്കങ്ങള് രേഖയുടെ ഭാഗത്ത് നിന്നും ഉണ്ടായിരിക്കുന്നു എന്നതാണ് ഏറ്റവും പുതിയ വാര്ത്തകള് .
അതിന്റെ ഭാഗമായിരുന്നു സിനിമാമേഖലയിൽ ഇരുപതു വർഷം പൂർത്തിയാക്കിയ ഐശ്വര്യയെ അഭിനന്ദിച്ചുകൊണ്ട് രേഖ ആഷിനു കത്തെഴുതിയതെന്നാണ് ഇന്ന് പുറത്തുവന്നിരിക്കുന്ന റിപ്പോര്ട്ട് . മാത്രമല്ല ഇരു കൂട്ടരെയും ഒന്നിപ്പിക്കാന് മധ്യസ്ഥത ഐശ്വര്യാ വകയാണെന്നും പറയുന്നു
ജയാബച്ചനും രേഖയും തമ്മിലുള്ള ശീതയുദ്ധമൊന്നും കാര്യമാക്കാതെ ഐശ്വര്യ രേഖുമായി സൗഹൃദം സൂക്ഷിക്കുന്നുണ്ടായിരുന്നു . അവാർഡ് ദാനച്ചടങ്ങുകൾക്കും മറ്റു പല അവസരങ്ങളിലും രേഖയെ കാണുമ്പോൾ അമ്മ എന്നാണ് ഐശ്വര്യ രേഖയെ അഭിസംബോധന ചെയ്യുന്നത്. ആ സ്നേഹം രേഖയ്ക്ക് ആഷിനോട് ഉണ്ട് .
എന്റെ ആഷ് എന്ന അഭിസംബോധനയോടെയാണ് രേഖ എഴുതിത്തുടങ്ങിയത്.
സ്വയം തീരുമാനിച്ച ലക്ഷ്യത്തിലേക്ക് അല്ലലില്ലാതെ ഒഴുകുന്ന നദിയാണവൾ. ഒട്ടും നാട്യമില്ലാതെ തടഞ്ഞുനിൽക്കാതെ ലക്ഷ്യത്തിലേക്ക് സുഗമമായൊഴുകുകയാണവൾ എന്ന ആമുഖത്തോടെയാണ് സിനിമയിൽ 20 വർഷം പൂർത്തിയാക്കിയ ഐശ്വര്യക്ക് രേഖ കത്തെഴുതിയത്.
‘നീ പറഞ്ഞ കാര്യങ്ങളെക്കുറിച്ചും ചെയ്ത കാര്യങ്ങളെക്കുറിച്ചും ആളുകൾ ചിലപ്പോൾ മറന്നു പോയേക്കാം. പക്ഷേ നീ മറ്റുള്ളവർക്കു നൽകുന്ന ഫീൽ എന്താണോ അതനുസരിച്ചായിരിക്കും അവരുടെ മനസ്സിൽ നീയെന്നും ഓർമ്മിക്കപ്പെടുക.
നിന്റെ ഉള്ളിലെ ധൈര്യവും നിന്റെ ഊർജ്ജവുമാണ് നീ സംസാരിക്കും മുമ്പു തന്നെ നിന്നെക്കുറിച്ചു പറഞ്ഞു തുടങ്ങുക. ധൈര്യമാണ് എല്ലാ ഗുണങ്ങളുടേയും അടിസ്ഥാനം എന്നതിന്റെ ജീവിച്ചിരിക്കുന്ന ഉദാഹരണമാണ് നീ.
നമ്മളെടുക്കുന്ന ശ്വാസത്തിന്റെ കണക്കനുസരിച്ചല്ല ജീവിതം അളക്കുന്നത് മറിച്ച് നമ്മള് ശ്വാസമെടുക്കുന്ന നിമിഷങ്ങളെ വച്ചാണ്. നിനക്കിഷ്ടമുള്ള കാര്യങ്ങളാണ് നീ ചെയ്യുന്നത് അതുകൊണ്ടു കൂടിയാണ് ആളുകൾക്ക് നിന്റെമേൽ നിന്ന് കണ്ണെടുക്കാനാകാത്തതും. നീ നീയായിയിരിക്കാൻ എപ്പോഴും ശ്രദ്ധിക്കുന്നു.
നീ ഒരുപാടു ദൂരങ്ങൾ താണ്ടിയിരിക്കുന്നു. പ്രശ്നങ്ങളിൽ നിന്ന് ഒരു ഫീനിക്സ് പക്ഷിയെപ്പോലെ പറന്നുയർന്നാണ് ഇതൊക്കെ സാധ്യമാക്കിയതെന്നും എനിക്കറിയാം.’