ബെയ്ജിംഗ്: വിമാനത്തിന്റെ കോക്പിറ്റിൽ സുന്ദരിയെ കൂടെ യാത്ര ചെയ്യാൻ അനുവദിച്ച പൈലറ്റിന്റെ പണി തെറിച്ചു.
ചൈനക്കാരൻ പൈലറ്റിനാണ് വാനത്ത് പറക്കുമ്പോൾ സുന്ദരിയുടെ സാമിപ്യം വിനയായി മാറിയത്. പൈലറ്റിനൊപ്പം കോക്പിറ്റിൽ ഇരിക്കുന്ന ചിത്രം പെൺകുട്ടി സമൂഹമാധ്യമങ്ങളിൽ പോസ്റ്റ് ചെയ്തതാണ് പൈലറ്റിനു വിനയായത്.
ജനുവരി നാലിന് എയർ ഗ്യുയിലിൻ വിമാനത്തിൽ ഗ്യുയിലിനിൽനിന്ന് യാംഗ്ഷുവിലേക്ക് പറക്കുമ്പോഴായിരുന്നു സംഭവം. എന്നാൽ കഴിഞ്ഞ ഞായറാഴ്ചയാണ് സംഭവം വിമാനകമ്പനിയുടെ ശ്രദ്ധയിലെത്തുന്നത്.
കോക്പിറ്റിൽ യാത്ര ചെയ്യുന്ന സുന്ദരിയുടെ ചിത്രം സമൂഹമാധ്യമമായ വെയ്ബോയിൽ ആളുകൾ കൊത്തിപ്പറക്കാൻ തുടങ്ങിയതോടെയാണ് വിമാനകമ്പനി സംഭവം ഗൗരവമായി കണ്ടത്. പൈലറ്റിന്റെ ലൈസൻസ് അധികൃതർ റദ്ദാക്കി.
കൈവിരലുകൾ ഉയർത്തി വിജയ ചിഹ്നം കാണിച്ച് കോക്പിറ്റിൽ ഇരിക്കുന്ന ചിത്രം ക്യാപ്റ്റനു നന്ദിപറഞ്ഞുള്ള അടിക്കുറിപ്പോടെയാണ് പെൺകുട്ടി പോസ്റ്റിയത്. സംഭവം നിമിഷനേരംകൊണ്ട് വൈറലായി. കോക്പിറ്റിൽ യാത്രക്കാരെ അനുവദിച്ച സംഭവം ചർച്ചയായതോടെ വിമാന കമ്പനി നടപടി സ്വീകരിക്കുകയായിരുന്നു.