തിരുവനന്തപുരം: വര്‍ഗീയ ശക്തികള്‍ക്കെതിരേ പ്രതികരിക്കാന്‍ ആരുടെയും ട്യൂഷന്‍ വേണ്ടെന്നു മുഖ്യമന്ത്രി പിണറായി വിജയന്‍. 'പൗരത്വ നിയമ ഭേദഗതിക്കെതിരായ പ്രക്ഷോഭങ്ങള്‍ക്കു പിന്നില്‍ തീവ്രവാദികളാണെന്നു കേരളത്തിന്‍റെ മുഖ്യമന്ത്രി പറഞ്ഞു' എന്ന പ്രധാനമന്ത്രി നരേന്ദ്ര മോദിയുടെ പ്രസ്താവനയ്ക്ക് മറുപടിയുമായി മുഖ്യമന്ത്രി.
/sathyam/media/post_attachments/EFfV2JlOM3Yas7kGGyER.jpg "publive-image")
ആര്‍എസ്‌എസിന്‍റെയും എസ്ഡിപിഐയുടെയും വര്‍ഗീയ ലക്ഷ്യങ്ങള്‍ക്കെതിരായ പോരാട്ടത്തില്‍ ഒന്നാം സ്ഥാനത്താണു കേരളം എന്നതുകൊണ്ട് അസ്വസ്ഥത പ്രകടിപ്പിക്കുന്നവരില്‍ രാജ്യത്തിന്‍റെ പ്രധാനമന്ത്രി ഉണ്ടാകുന്നത് ജനാധിപത്യ സംസ്കാരത്തിന് ഭൂഷണമല്ലെന്ന് മുഖ്യമന്ത്രി ഫേസ്ബുക്ക് കുറിപ്പില്‍ പറഞ്ഞു.
മുഖ്യമന്ത്രിയുടെ നിയമസഭയിലെ പ്രസംഗത്തെ പൗരത്വഭേദഗതിക്കെതിരെ സമരം ചെയ്യുന്നവരെ വിമര്‍ശിക്കാന്‍ പ്രധാനമന്ത്രി ആയുധമാക്കിയ സാഹചര്യത്തിലാണ് പിണറായിയുടെ പ്രതികരണം. പ്രധാനമന്ത്രിയുടെ പരാമര്‍ശം വസ്തുതാവിരുദ്ധവും പ്രതിഷേധാര്‍ഹവുമാണെന്ന് മുഖ്യമന്ത്രി പറഞ്ഞു.
ചില സമരങ്ങളില്‍ എസ്.ഡി.പി.ഐ പോലുള്ള തീവ്രവാദ സ്വഭാവമുള്ള സംഘങ്ങളുടെ പങ്കാളിത്തത്തെപ്പറ്റി പരാമര്‍ശിച്ചത് ഉത്തമബോദ്ധ്യത്തിലാണ്. സംഘപരിവാറിന്‍റെ വര്‍ഗീയ അജന്‍ഡ തകര്‍ക്കാനുള്ള ഏക ആയുധം മതനിരപേക്ഷയുടേതാണെന്ന ബോദ്ധ്യമാണ് കേരളത്തെ നയിക്കുന്നത്. ആ മഹാ പ്രതിരോധത്തില്‍ വര്‍ഗീയതയുടെ വിഷം തേയ്ക്കാന്‍ ആര് ശ്രമിച്ചാലും ചെറുത്തു തോല്‍പ്പിക്കും.
പൗരത്വ നിയമ ഭേദഗതിക്കെതിരായ പ്രതിരോധം ഒറ്റക്കെട്ടായതും ജനാധിപത്യപരവുമാണ്. ഈ കൂട്ടായ്മയും അതിലൂടെ സൃഷ്ടിക്കപ്പെടുന്ന കരുത്തും കേരളത്തിന്‍റെ ഉന്നതമായ മതനിരപേക്ഷ മൂല്യങ്ങളുടെ സവിശേഷതയാണ്. അതിനെ ഇകഴ്ത്താനും തകര്‍ക്കാനും ചിലര്‍ക്ക് അത്യാഗ്രഹമുണ്ട്. അത്തരം അതിമോഹക്കാര്‍ക്ക് കേരളം ഒന്നിച്ചു നിന്ന് മറുപടി നല്‍കുമെന്നും മുഖ്യമന്ത്രി പറഞ്ഞു.
Follow Us/sathyam/media/agency_attachments/5VspLzgrB7PML1PH6Ix6.png)
