കൊവിഡ് പോസിറ്റീവായ വിദ്യാര്‍ത്ഥികള്‍ക്ക് ആശ്വാസവുമായി സിബിഎസ്ഇ; പ്രാക്ടിക്കല്‍ പരീക്ഷ മുടങ്ങുമെന്ന ആശങ്ക വേണ്ട, പരിഹാരമുണ്ട് !

ഡല്‍ഹി: രാജ്യത്തുടനീളം കൊവിഡ് കേസുകള്‍ വർദ്ധിക്കുന്ന ഈ സമയത്ത് കൊവിഡ് പോസിറ്റീവായ വിദ്യാര്‍ത്ഥികള്‍ക്ക് ആശ്വാസവുമായി സിബിഎസ്ഇ. രോഗം സ്ഥിരീകരിച്ച വിദ്യാർത്ഥികൾക്കായി സെൻട്രൽ ബോർഡ് ഓഫ് സെക്കൻഡറി എജ്യുക്കേഷൻ (സിബിഎസ്ഇ) ഒരു വലിയ പ്രഖ്യാപനം നടത്തി.

അറിയിപ്പ് അനുസരിച്ച്, ഒരു വിദ്യാർത്ഥി കൊവിഡ് പോസിറ്റീവാണെങ്കില്‍ അവര്‍ ലബോറട്ടറിയിലെ പ്രാക്ടിക്കല്‍ പരീക്ഷകളെ കുറിച്ച് ഓര്‍ത്ത് വിഷമിക്കേണ്ടതില്ല.

ഇതുസംബന്ധിച്ച വിജ്ഞാപനം പുറപ്പെടുവിച്ച സിബിഎസ്ഇ, അത്തരം വിദ്യാർത്ഥികൾക്കുള്ള പ്രായോഗിക പരീക്ഷകൾ ഒന്നുകിൽ മാറ്റിവയ്ക്കുമെന്നും അല്ലെങ്കില്‍ ഏപ്രിലില്‍ എഴുത്തു പരീക്ഷകള്‍ കഴിഞ്ഞ ശേഷമോ നടത്തുമെന്നും വ്യക്തമാക്കി.

സി.ബി.എസ്.ഇ സർക്കുലർ അനുസരിച്ച് കോവിഡ് ബാധിച്ച വിദ്യാർത്ഥികൾക്ക് വിശ്രമിക്കാനും വീട്ടിൽ നിരീക്ഷണത്തില്‍ തുടരാനും നിര്‍ദ്ദേശമുണ്ട്. കൂടാതെ, ഏതെങ്കിലും വിദ്യാർത്ഥി കൊവിഡ് പോസിറ്റീവാകുകയും പ്രായോഗിക പരീക്ഷയ്ക്ക് ഹാജരാകാൻ കഴിയാതിരിക്കുകയും ചെയ്താൽ അത്തരം വിദ്യാർത്ഥികൾക്കുള്ള പ്രായോഗിക പരീക്ഷകൾ പിന്നീടുള്ള തീയതിയിൽ നടത്താമെന്ന് സിബിഎസ്ഇ പറഞ്ഞു.

ഈ തീരുമാനം മാതാപിതാക്കൾക്കും വിദ്യാർത്ഥികൾക്കും ആശ്വാസമാകുമെന്ന് അധികൃതര്‍ വ്യക്തമാക്കി. സിബിഎസ്ഇ ബോർഡ് പ്രായോഗിക പരീക്ഷകൾ ആരംഭിച്ച സമയത്താണ് കൊറോണ വൈറസ് കേസുകൾ വീണ്ടും ഉയര്‍ന്നത്. ഇത് ആശങ്കയ്ക്ക് ഇടയാക്കിയിരുന്നു.

കൊൽക്കത്തയിലെ പല സ്കൂളുകളും പന്ത്രണ്ടാം ക്ലാസ് ബോർഡ് പ്രാക്ടിക്കലുകൾ ആരംഭിച്ചു.