കുവൈറ്റ് : കുവൈറ്റിലെ ഡെലിവറി കമ്പനികള്ക്ക് ലൈസന്സ് നല്കുന്നത് നിര്ത്തലാക്കി . ഡെലിവറി കമ്പനികൾക്ക് ലൈസൻസ് അനുവദിക്കുന്നത് നിർത്തിവെക്കാൻ ആഭ്യന്തര മന്ത്രാലയമാണ് വാണിജ്യമന്ത്രാലയത്തോട് ഉത്തരവിട്ടത് .
ഇത്തരം ചില കമ്പനികൾ വിതരണം ചെയ്യുന്ന സാധനങ്ങൾ ആരോഗ്യത്തിന് ഹാനികരമായതാണെന്നും ഇവയെ നിയന്ത്രിക്കാൻ പുതിയ ചട്ടങ്ങൾ ആവശ്യമാണെന്നും നിർദേശത്തിൽ പറയുന്നു. ചില കമ്പനികൾ സ്വന്തം വിസയിലല്ലാത്ത തൊഴിലാളികളെ അനധികൃതമായി വെക്കുന്നു. ഡെലിവറി വിപണിയെ നിയന്ത്രിക്കാൻ പുതിയ സംവിധാനങ്ങൾ രൂപപ്പെടുത്തേണ്ടതുണ്ട്. നിലവിലെ തുറന്നുവിട്ട അവസ്ഥക്ക് മാറ്റം വരണമെന്ന് ആഭ്യന്തര വകുപ്പ് വ്യക്തമാക്കി.
പുതിയ കമ്പനികൾ വരുന്നതിന് വാണിജ്യ മന്ത്രാലയം എതിരല്ലെന്നും ആഭ്യന്തര മന്ത്രാലയ നിർദേശം പാലിച്ചുകൊണ്ട് വ്യവസ്ഥാപിതത്വം കൊണ്ടുവരുന്നതിനായി തൽക്കാലം ലൈസൻസ് നൽകുന്നത് നിർത്തിവെച്ചുവെന്നും വാണിജ്യ മന്ത്രാലയം അറിയിച്ചു.