തിരുവനന്തപുരം: കോവിഡ് വ്യാപന സാഹചര്യത്തില് മുഖ്യമന്ത്രിയുടെ ദുരിതാശ്വാസ നിധിയിലേക്ക് വ്യാഴാഴ്ച സംഭാവനയായി ലഭിച്ചത് 32 കോടി രൂപ. പിണറായി വിജയന്റെ ഓഫീസാണ് ഇക്കാര്യം അറിയിച്ചത്.
ആകെ 32,01,71,627 രൂപയാണ് വ്യാഴാഴ്ച ലഭിച്ചത്. വൈദ്യുതി ബോര്ഡിലെ ജീവനക്കാരുടെയും ഓഫീസര്മാരുടെയും ഒരുമാസത്തെ ശമ്പളം നല്കാമെന്ന് അറിയിച്ചു. ഇതിന്റെ ആദ്യ ഗഡുവായി 20 കോടി രൂപയുടെ ചെക്ക് വൈദ്യുതി മന്ത്രി എം.എം. മണി കൈമാറി. അഞ്ചു ജില്ലകളിലെ ആശുപത്രികളില് വെന്റിലേറ്റര് സംവിധാനം ഒരുക്കുന്നതിന് 50 കോടി രൂപ കെഎസ്ഇബി നേരത്തേ നല്കിയിരുന്നു.
കേരള പവര് ആന്ഡ് ഇന്ഫ്രാസ്ട്രക്ചര് ഫിനാന്സ് കോര്പ്പറേഷന് ഒരുകോടി രൂപ സംഭാവന നല്കി. കേരള പോലീസ് ഹൗസിംഗ് സഹകരണ സംഘം ഒരുകോടി രൂപ സംഭാവന നല്കി. കൊല്ലം കോര്പ്പറേഷന് ഒരുകോടി രൂപയും കേരള യൂണിവേഴ്സിറ്റി എംപ്ലോയീസ് സഹകരണസംഘം 50 ലക്ഷം രൂപയും സംഭാവന നല്കി.
കേരള സ്റ്റേറ്റ് സര്വീസ് പെന്ഷനേഴ്സ് യൂണിയന് 50 ലക്ഷം രൂപയും ഓച്ചിറ ബ്ലോക്ക് പഞ്ചായത്ത് 20 ലക്ഷം രൂപയും സംഭാവനയായി ദുരിതാശ്വാസ നിധിയിലേക്ക് കൈമാറി. സര്ക്കാര് ജീവനക്കാരുടെ ഒരു മാസത്തെ ശന്പളം ദുരിതാശ്വാസ നിധിയിലേക്ക് സമാഹരിക്കാനുള്ള നിര്ദേശത്തെ ഐഎന്ടിയുസി സ്വാഗതം ചെയ്തിട്ടുണ്ടെന്നും മുഖ്യമന്ത്രി അറിയിച്ചു.