പിറന്നമണ്ണുവിട്ടു ഞാന്
പറന്നുവന്നതാണിതില്
പ്രതീക്ഷയറ്റ ജീവിതം
പ്രകാശപൂര്ണ്ണമാക്കുവാന്
കൊഴിഞ്ഞുവീണ നാളുകള്
തിരിഞ്ഞു നോക്കുകെങ്കിലീ -
പ്രവാസ ജീവിതത്തിലെന്
പ്രധാനസ്വത്തിതക്ഷരം
മഹീതലേ മഹത്തരം
മനോജ്ഞമെന്റെ മാത്രുഭൂ
പണാധിപത്യ രാജ്യദ്രോഹി -
കള്ക്കതിന്നു സ്വര്ഗ്ഗ ഭൂ
ജനിച്ചുവീണ നാള്മുതല്
കടക്കെണിയിലാണ് നാം
കരഞ്ഞു തീര്ക്കുവാന് വിധിച്ച
മക്കള് ഭാരതീയര് നാം
ദുഷിച്ച രാജനൈതികര്
തകര്ത്തെറിഞ്ഞ ഭാരതം
പടച്ചുവിട്ടിടുന്നുവോ -
പ്രവാസിയാകുവാന് വൃഥാ.
കഠോര ചൂഷണങ്ങളില്
പൊറുതിമുട്ടിയെത്രയോ
നിരാശ്രയര് സഹോദരര്
പിടഞ്ഞിടുന്നു നിത്യവും.
മണല്പ്പരപ്പിലുഷ്ണമേ -
റ്റുരൂകിടും പ്രവാസിതന്
മനസിലുണ്ട് മാതൃരാജ്യ -
മെന്ന സ്വപ്നമന്ദിരം.
നിറഞ്ഞടര്ന്നുവീണ കണ്ണു -
നീരലിഞ്ഞ മാറില്നി -
ന്നുയര്ന്നു വന്നിടട്ടെ വിശ്വ -
മാതൃകയായ് ഭാരതം.