ആസിയാബീവിയുടെ വധശിക്ഷ റദ്ദാക്കിയ വിധി: പാകിസ്ഥാനിൽ വ്യാപക അക്രമവും ലഹളയും

പാക്കിസ്ഥാനിൽ മതനിന്ദയുടെ പേരിൽ വധശിക്ഷയ്ക്കു വിധിക്കപ്പെട്ടു ജയിലിൽക്കഴിഞ്ഞിരുന്ന ക്രിസ്ത്യൻ യുവതിയായ ആസിയാ ബീവിയുടെ വധശിക്ഷ റദ്ദാക്കിയ പാക്ക് സുപ്രീം കോടതിയുടെ വിധിക്കെതിരെ പാക്കിസ്ഥാനിലെങ്ങും വ്യാപകമായ പ്രതിഷേധം നടക്കുകയാണ്.

പഞ്ചാബ് പ്രവിശ്യയിൽ പൂർണ്ണമായും 144 പ്രഖ്യാപിച്ചു. 5 പേരിൽ കൂടുതൽ കൂടിനിൽക്കരുതെന്ന് പല സ്ഥലത്തും മൈക്കിൽ ക്കൂടെ പോലീസ് മുന്നറിയിപ്പ് നൽകുകയാണ്. ഫൗജാബാദ് - ഇസ്ലാമാബാദ് ഹൈവേകളെ ബന്ധിപ്പിക്കുന്ന റോഡ് ഗതാഗതം ആളുകൾ തടഞ്ഞിരിക്കുന്നു.

വിവിധ മസ്‌ജിദുകളിൽ നിന്ന് മൈക്കിൽക്കൂടി ആളുകളോട് വീടുവിട്ടു പുറത്തിറങ്ങാനും സുപ്രീംകോടതിവിധിക്കെതിരേ തെരുവിൽ പ്രതിഷേധിക്കാനും ആഹ്വാനം നൽകുകയാണ്.

കറാച്ചിയിലെ തെരുവുകളിൽ വടികളുമായി എത്തിയ യുവാക്കൾ വാഹനങ്ങൾ തടഞ്ഞു റോഡുകൾ ബ്ലോക്ക് ചെയ്യുന്നു. പാക്കിസ്ഥാനിലെങ്ങും പ്രക്ഷോഭം വ്യാപിക്കുകയാണ്. ലാഹോറിലെ വലിയ മാർക്കറ്റ് അടച്ചുപൂട്ടി. അവിടെ പല സ്ഥലത്തും ധർണ്ണയും പ്രകടനങ്ങളും നടക്കുന്നു.കടകളെല്ലാം അടച്ചു വ്യാപാരികൾ സ്ഥലം വിട്ടു.

ഇതിനിടെ പാക്കിസ്ഥാനിലെ മനുഷ്യാവകാശ സംഘടനകൾ ആസിയാബീവിയുടെ കുടുംബാംഗങ്ങൾക്കും അഭിഭാഷകർക്കും അടിയന്തരമായി സുരക്ഷയൊരുക്കാൻ സർക്കാരിനോടപേക്ഷിച്ചിരിക്കുകയാണ്.

പ്രക്ഷോഭകാരികൾ ആസിയാബീവിക്കും അവരുടെ അഭിഭാഷകർക്കും സുപ്രീം കോടതി ജഡ്‌ജിമാർ ക്കുമെതിരെ അപശബ്ദങ്ങളടങ്ങിയ മുദ്രാവാക്യങ്ങളാണ് വിളിക്കുന്നത്. പട്ടാളത്തോട് സജ്ജരായിരിക്കാൻ സർക്കാർ നിർദ്ദേശം നൽകിക്കഴിഞ്ഞു.

വിധി പ്രസ്താവിച്ചത് പാക്കിസ്ഥാൻ സുപ്രീം കോടതിയുടെ മൂന്നംഗ ബഞ്ചാണ്. വിധിന്യായത്തിൽ കീഴ്‌ക്കോടതിവിധി റദ്ദു ചെയ്യുന്നുവെന്നും ആസിയാബീവിയുടെ പേരിൽ മറ്റു കേസുകളൊന്നും നിലവിലില്ലാത്തതിനാൽ അവരെ ഉടനടി മോചിപ്പിക്കണമെന്നുമാണ് കോടതി നിർദ്ദേശിച്ചിരിക്കുന്നത്.

സുപ്രീം കോടതി യുടെ വിധിന്യായത്തിൽ ചീഫ് ജസ്റ്റിസ് 'മിയാ ഷാക്കിബ് നിസാർ' വളരെ വിശദമായി പല കാര്യങ്ങളും പ്രതിപാദിക്കുകയുണ്ടായി. " പ്രവാചകനെയും ,ഖുറാനെയും അപമാനിക്കുന്നത്തിനുള്ള ശിക്ഷ ജീവപര്യന്തമോ തൂക്കുകയറോ ആണ്. എന്നാൽ ഇത് പലപ്പോഴും വ്യാജവും തെറ്റായരീതിയിലും പലരിലും ആരോപിക്കപ്പെടുന്നതായി മനസ്സിലാക്കുന്നു. കഴിഞ്ഞ 28 വർഷത്തിനുള്ളിൽ മതനിന്ദ ആരോപിക്കപ്പെട്ട 62 പേരെ കോടതിവിധി വരുന്നതിനുമുമ്പുതന്നെ കൊലപ്പെടുത്തിയ കാര്യവും അദ്ദേഹം വിധിന്യായത്തിൽ പരാമർശിക്കുകയുണ്ടായി.