തിരുവനന്തപുരം : ഡൽഹി കലാപം റിപ്പോർട്ടുചെയ്തതിന് മലയാള മാധ്യമങ്ങളായ ഏഷ്യാനെറ്റ്, മീഡിയ വൺ ചാനലുകളുടെ സംപ്രേഷണം നിർത്തിവയ്പിച്ച കേന്ദ്രസർക്കാർ നടപടിയെ അപലപിച്ച് കേരള നിയമസഭ സംയുക്ത പ്രമേയം പാസാക്കണമെന്ന് ഓണ്ലൈന് മാധ്യമ കൂട്ടായ്മയായ കോം ഇന്ത്യ .
മാധ്യമ സ്വാതന്ത്ര്യത്തിനു മേലുള്ള അങ്ങേയറ്റം പ്രതിഷേധാർഹമായ നടപടിയാണ് ഇതെന്ന് പറയാതെ വയ്യ. വാർത്ത ചാനലുകളെ തടഞ്ഞു അപ്രഖ്യാപിത അടിയന്തരാവസ്ഥ സൃഷ്ടിക്കാനാണ് ശ്രമം.
വാർത്ത റിപ്പോർട്ടു ചെയ്തതിന്റെ പേരിൽ ചാനലുകൾക്കെതിരെ നടപടിയെടുക്കുന്നത് മാധ്യമസ്വാതന്ത്ര്യത്തിനു നേരെയുള്ള കയ്യേറ്റമാണ്. മാധ്യമങ്ങൾ തങ്ങൾ പറയുന്നതുമാത്രം റിപ്പോർട്ടുചെയ്താൽ മതിയെന്ന നിലപാട് ജനാധിപത്യത്തിന് ഭൂഷണമല്ല. ഇത് ആർക്കും അംഗീകരിക്കാനുമാകില്ല. കടുത്ത പ്രതിഷേധം ഉയർന്നതോടെ വിലക്ക് നീക്കി സർക്കാർ ഉത്തരവ് വന്നിരിക്കുകയാണ്.
ഈ സാഹചര്യത്തിൽ കേരള നിയമസഭാ ഒറ്റക്കെട്ടായി പ്രമേയം പാസാക്കണമെന്നും സംസ്ഥാനത്തിന്റെ പ്രതിഷേധം കേന്ദ്രത്തെ അറിയിക്കണമെന്നും ആവശ്യപെട്ട് കോം ഇന്ത്യ മുഖ്യമന്ത്രിക്കും പ്രതിപക്ഷ നേതാവിനും കത്ത് നല്കി .