തിരുവനന്തപുരം: ഇന്ത്യയിൽ കോവിഡിൻ്റെ രണ്ടാം തരംഗം പിടിമുറുക്കുകയാണ്. ഈ സാഹചര്യത്തിൽ ഗൂഗിൾ രണ്ട് ഫീച്ചറുകളും അപ്ഡേറ്റുകളും പുറത്തിറക്കി. YouTube, Google മാപ്സ് എന്നിവയിലാണ് പുതിയ ഫീച്ചേഴ്സ് കൂട്ടിച്ചേർത്തിരിക്കുന്നത്.
വാക്സിൻ സുരക്ഷ, വാക്സിൻ ഫലപ്രാപ്തി, പാർശ്വഫലങ്ങൾ എന്നിവയുമായി ബന്ധപ്പെട്ട അപ്ഡേറ്റുകൾ, കോ-വിൻ വെബ്സൈറ്റിലേക്ക് ഉപയോക്താക്കളെ നയിക്കുന്ന രജിസ്ട്രേഷൻ വിവരങ്ങൾ എന്നിവ പ്രദർശിപ്പിക്കുമെന്ന് ഗൂഗിൾ പറഞ്ഞു.
പ്രിവൻഷൻ ആൻഡ് ട്രീറ്റ്മെന്റ് ടാബിന് കീഴിൽ ഉപയോക്താക്കൾക്ക് വൈറസിൽ നിന്ന് രക്ഷനേടാനും ചികിത്സയ്ക്കുമുള്ള വഴികൾ തേടാനും കഴിയും. ഇതിനായി അംഗീകൃത മെഡിക്കൽ സ്രോതസ്സുകളിൽ നിന്നും ആരോഗ്യ കുടുംബക്ഷേമ മന്ത്രാലയത്തിൽ നിന്നുമുള്ള വിവരങ്ങൾ ഗൂഗിൾ ശേഖരിച്ചു.
“Google ലെ ഞങ്ങളുടെ ടീമുകൾ രാജ്യമെമ്പാടുമുള്ള ആശുപത്രികൾ, ലാഭരഹിത സ്ഥാപനങ്ങൾ, പൊതുജനാരോഗ്യ സേവന ദാതാക്കളുടെ അശ്രാന്ത പരിശ്രമത്തെ പിന്തുണയ്ക്കുന്നു. ഇപ്പോൾ, ഞങ്ങൾ മൂന്ന് മുൻഗണനാ മേഖലകളിലാണ് ശ്രദ്ധ കേന്ദ്രീകരിച്ചിരിക്കുന്നത്:
ആളുകൾക്ക് ഏറ്റവും പുതിയതും ആധികാരികവുമായ വിവരങ്ങൾ ആക്സസ് ചെയ്യാൻ കഴിയുമെന്ന് ഉറപ്പാക്കുന്നു; സുപ്രധാന സുരക്ഷയും വാക്സിനേഷൻ സന്ദേശങ്ങളും വർദ്ധിപ്പിക്കുക, രോഗ ബാധിത സമൂഹങ്ങൾക്കും ആരോഗ്യ പ്രവർത്തകർക്കും മറ്റ് ഓർഗനൈസേഷനുകൾക്കും സാമ്പത്തിക പിന്തുണ നൽകുന്നു. ” എന്നാണ് പുതിയ അപ്ഡേറ്റുകൾ പ്രഖ്യാപിച്ചുകൊണ്ട് Google ഒരു ബ്ലോഗിൽ വ്യക്തമാക്കുന്നത്.
ഗൂഗിൾ പുറത്തിറക്കിയ ഏറ്റവും ഉപയോഗപ്രദമായ അപ്ഡേറ്റുകളിലൊന്നാണ് ഗൂഗിൾ സെർച്ചിലെ ടെസ്റ്റ് കേന്ദ്രങ്ങൾ കണ്ടെത്താനുള്ള കഴിവ്. ഇത് കൂടാതെ സെർച്ച് ഭീമൻ രാജ്യത്തൊട്ടാകെയുള്ള 23,000 വാക്സിനേഷൻ സെന്ററുകളുടെ സ്ഥലങ്ങൾ ഇംഗ്ലീഷിലും എട്ട് ഇന്ത്യൻ ഭാഷകളിലും പ്രദർശിപ്പിക്കും.
ഇന്ത്യയിലുടനീളമുള്ള ഉപയോക്താക്കൾക്ക് കൂടുതൽ വാക്സിനേഷൻ കേന്ദ്ര വിവരങ്ങൾ ലഭ്യമാക്കുന്നതിനായി ആരോഗ്യ കുടുംബക്ഷേമ മന്ത്രാലയവുമായി ചേർന്ന് പ്രവർത്തിക്കുമെന്ന് ബ്ലോഗിൽ ഗൂഗിൾ വ്യക്തമാകുന്നു.
ഇതിനുപുറമെ, ആശുപത്രി കിടക്കകളുടെയും ഓക്സിജൻ സിലിണ്ടറുകളുടെയും ലഭ്യതയെക്കുറിച്ച് ഉപയോക്താക്കളെ അറിയിക്കുന്ന പുതിയ സവിശേഷത കൊണ്ടുവരാനും ഗൂഗിളിന് പദ്ധതിയുണ്ട്.