തൃശൂർ: കോവിഡിന്റെ പശ്ചാത്തലത്തിൽ നൽകുന്ന സൗജന്യകിറ്റ് ഗുണഭോക്താക്കൾക്ക് ഡിസംബർ 10നകം നൽകാൻ നിർദേശം. അന്ത്യോദയ, മുൻഗണന വിഭാഗം കാർഡുകൾക്കാണ് നവംബറിന് പിന്നാലെ ഡിസംബറിലെയും കിറ്റ് നൽകാൻ കർശന നിർദേശമുണ്ടായത്.
മുൻഗണനേതര (നീല കാർഡ്), വിഭാഗത്തിനും പൊതുവിഭാഗത്തിനും (വെള്ള കാർഡ്) നവംബർ, ഡിസംബർ കിറ്റുകൾ ഒന്നിച്ച് തെരഞ്ഞെടുപ്പിനുശേഷം നൽകും. അതേസമയം, ഗുണഭോക്താക്കളിൽ തന്നെ മുൻഗണന വിഭാഗത്തിന് നവംബറിലെ കിറ്റ് വിതരണം ചില താലൂക്കുകളിൽ പൂർത്തിയായില്ല. നിർദേശം എത്തും മുൻപേ തന്നെ കിറ്റ് അന്വേഷിച്ച് റേഷൻ കടകളിൽ വന്ന നീല, വെള്ള കാർഡുകാർക്ക് കിറ്റ് നൽകുകയും ചെയ്തിരുന്നു. ഇത് ശ്രദ്ധയിൽപെട്ടതോടെയാണ് ഗുണഭോക്താക്കൾക്ക് മാത്രം നൽകണമെന്ന നിർദേശം കർശനമാക്കിയത്.
നവംബറിലെ മുൻഗണന കിറ്റ് 19നകം നൽകാനായിരുന്നു നിർദേശം. എന്നാൽ ഇത് പൂർത്തീകരിക്കാനായില്ല. നവംബർ ആദ്യ ആഴ്ചയിൽ തീർക്കേണ്ട മുൻഗണന കിറ്റ് വിതരണം പൂർത്തിയായത് മാസം പകുതിയോടെയാണ്. ഈ സാഹചര്യത്തിൽ, ക്രിസ്മസ് കിറ്റ് ഡിസംബർ 10നകം നൽകാനുള്ള സാധ്യത വിരളമാണ് എന്നാണ് സൂചന.
10നകം അന്ത്യോദയ വിഭാഗത്തിന് കിറ്റ് നൽകാനാവുമെന്നാണ് സിവിൽ സപ്ലൈസ് അധികൃതരുടെ നിലപാട് എങ്കിലും ഏറെ കാർഡുകളുള്ള മുൻഗണന വിഭാഗത്തിന് ഈ സമയത്തിനകം നൽകാനാവില്ലെന്നും ഉദ്യോഗസ്ഥർ വ്യക്തമാക്കി. വെളിച്ചെണ്ണ, ഗോതമ്ബ് നുറുക്ക് അടക്കം സാധനങ്ങൾ ഇല്ലാത്തതാണ് കിറ്റ് ഒരുക്കാൻ തടസ്സം.