ന്യൂഡല്ഹി: കോവിഡിനെതിരെ പോരാടുന്ന ഡോക്ടര്മാരും നഴ്സുമാരും ഉള്പ്പെടെ ആരോഗ്യപ്രവര്ത്തകര് കോവിഡ് വാക്സിനേഷന് നിരസിക്കരുതെന്ന് കേന്ദ്ര സര്ക്കാര്. വാക്സിനേഷന് സ്വീകരിക്കേണ്ടവര് ആളുകളെ വാക്സിന് കുത്തിവയ്പില്നിന്നും പിന്തിരിപ്പിക്കരുതെന്ന് നീതി ആയോഗ് അംഗം ഡോ. വി.കെ പോള് അഭ്യര്ഥിച്ചു.
വാക്സിനേഷന് സംബന്ധിച്ച അഭ്യൂഹങ്ങള്ക്ക് ഇരയാകരുതെന്നും ചെറിയ പാര്ശ്വഫലങ്ങള് സാധരണമാണെന്നും അദ്ദേഹം പറഞ്ഞു. വാക്സിന് നിര്മിക്കാന് വലിയ പരിശ്രമമാണ് നടന്നത്.
ആരോഗ്യപ്രവര്ത്തകര് പ്രത്യേകിച്ചും ഡോക്ടര്മാരും നഴ്സുമാരും വാക്സിന് കുത്തിവയ്പ് നിരസിക്കുന്നത് ആശങ്കപ്പെടുത്തുന്നതാണ്. ഈ മഹാവ്യാധി എന്ത് രൂപം പ്രാപിക്കുമെന്ന് അറിയാന് കഴിയില്ല. അത് അത്രയും വലുതായിരിക്കും. അതിനാല് വാക്സിന് സ്വീകരിക്കുക- ഡോ പോള് ആവശ്യപ്പെട്ടു.
വാക്സിന് പ്രതികൂലഫലങ്ങള് സംബന്ധിച്ച ആശങ്കകള് അടിസ്ഥാനരഹിതവും നിസാരവുമാണെന്ന് തോന്നുന്നു. രണ്ട് വാക്സിനുകളും സുരക്ഷിതമാണെന്നും അദ്ദേഹം പറഞ്ഞു.