റോം: ഇറ്റാലിയന് ഇതിഹാസ താരം ഡാനിയേല് ഡി റോസി പ്രഫഷണല് ഫുട്ബോളില് നിന്ന് വിരമിച്ചു. 36 വയസുകാരനായ റോസി 19 വര്ഷം നീണ്ട ഫുട്ബോള് കരിയറിനാണ് അവസാനമിട്ടത്.
പരിക്ക് കാരണം ക്ലബ്ബില് അവസരങ്ങള് കുറഞ്ഞതോടെയാണ് കളി അവസാനിപ്പിക്കാന് തീരുമാനിച്ചതെന്നാണ് റിപ്പോര്ട്ടുകള്.
നിലവില് അര്ജന്റീനന് ക്ലബായ ബോക ജൂനിയേഴ്സിന്റെ താരമായിരുന്നു അദ്ദേഹം.
മധ്യനിര താരമായ റോസി 18 വര്ഷത്തോളം ഇറ്റാലിയന് ക്ലബ് റോമയ്ക്ക് വേണ്ടിയാണ് കളിച്ചത്. 2000ല് ഒസ്റ്റിയ മരിയില് നിന്നാണ് റോസി റോമയിലേക്ക് കൂടുമാറിയത്.
ടീമിനായി 18 സീസണുകളിലായി 616 മത്സരങ്ങളില് താരം കളിച്ചു. 63 ഗോളുകളും അദ്ദേഹം വലയിലാക്കി. 2019-2020 സീസണില് ബോക്കയില് എത്തിയ താരം ആദ്യ മത്സരത്തില് തന്നെ ഗോള് നേടിയിരുന്നു. എന്നാല് ആറു മത്സരങ്ങള് കൂടി കളിക്കാന് മാത്രമാണ് താരത്തിന് അവസരം ലഭിച്ചത്.