വള വാങ്ങി നല്‍കാത്തതില്‍ മനപ്രയാസപ്പെട്ട് മകള്‍ ഫീനോയില്‍ എടുത്ത് കുടിച്ചു ; സംഭവം കണ്ട് ഹൃദയം തകര്‍ന്ന അമ്മ കെട്ടിടത്തിന്റെ മുകളില്‍ നിന്ന് ചാടി ; സംഭവം മുംബൈയില്‍

മുംബൈ : അമ്മ വള വാങ്ങി നല്‍കാഞ്ഞതിന്റെ മനപ്രയാസത്തില്‍ വീട്ടുകാരുടെ കണ്‍മുമ്പില്‍ വച്ച് ഫീനോയില്‍ കുടിച്ച് മകള്‍. ഇതു കണ്ട് ഹൃദയം തകര്‍ന്ന അമ്മ കെട്ടിടത്തിന്റെ മുകളില്‍ നിന്നു ചാടി. മുംബൈയിലെ ഓഷിവര മേഖലയിലെ ലോഖന്ദ്വാല മാര്‍ക്കറ്റിന് സമീപം ഞായറാഴ്ച വൈകിട്ടോടെയാണ് സംഭവം നടന്നത്.

ഒരു പെട്ടി വളയ്ക്ക് വേണ്ടിയാണ് പ്രിയയും അമ്മ സാഷി കോമള്‍ സാഗറും തമ്മില്‍ വഴക്കിട്ടതെന്ന് പൊലീസ് പറഞ്ഞു. ഇതേ തുടര്‍ന്ന് വീട്ടുകാരുടെ മുമ്പില്‍ വെച്ച് പെണ്‍കുട്ടി ഫിനോയില്‍ കുടിക്കുകയായിരുന്നു.

തുടര്‍ന്ന് പ്രിയയെ ആശുപത്രിയിലേക്ക് കൊണ്ടുപോയ ബന്ധുക്കള്‍ തിരികെ വീട്ടിലെത്തിയപ്പോഴാണ് സാഷിയെ കാണാതായ കാര്യം അറിയുന്നത്. തുടര്‍ന്ന് നടത്തിയ തെരച്ചിലില്‍ കെട്ടിടത്തിന് മുകളില്‍ നിന്ന് ചാടിയ നിലയില്‍ സാഷിയെ കെട്ടിടത്തിന്റെ രണ്ടാം നിലയില്‍ കണ്ടെത്തുകയായിരുന്നെന്ന് പൊലീസ് പറയുന്നു.