ന്യൂഡല്ഹി:പൗരത്വ നിയമ പ്രതിഷേധത്തെ ചൊല്ലി ഡല്ഹിയില് ഉണ്ടായ കലാപത്തില് മരിച്ചവരുടെ എണ്ണം അഞ്ചായി. ഒരു പോലീസ് ഉദ്യോഗസ്ഥനും നാലു സിവിലിയന്മാരുമാണ് മരിച്ചത്. 24 മണിക്കൂറായി തുടരുന്ന അക്രമത്തില് 50 പേര്ക്കു പരിക്കേറ്റിട്ടുണ്ട്.
മരിച്ചവരില് ഒരാളുടെ തലയ്ക്കാണു വെടിയേറ്റിരിക്കുന്നത്. ഹെഡ് കോണ്സ്റ്റബിളായ രത്തന് ലാലാണ് മരിച്ചത്. ഇദ്ദേഹത്തിനു കല്ലേറിലാണ് പരിക്കേറ്റത്. അക്രമത്തില് മറ്റൊരു ഡെപ്യൂട്ടി പോലീസ് കമ്മീഷണര് അമിത് ശര്മയ്ക്കും പരിക്കേറ്റിട്ടുണ്ട്. മരിച്ച മറ്റുള്ളവരുടെ പേരുവിവരങ്ങള് സംബന്ധിച്ചു വ്യക്തതയില്ല.
വടക്കുകിഴക്കന് ഡല്ഹിയില് പൗരത്വ നിയമ ഭേദഗതിക്കെതിരേ പ്രതിഷേധിക്കുന്നവരുടെ ഇടയിലേക്ക് നിയമത്തെ അനുകൂലിക്കുന്നവര് ഇരച്ചുകയറിയതിനെത്തുടര്ന്നാണ് സംഘര്ഷമുണ്ടായത്. ഏറ്റുമുട്ടലിനിടെ, അക്രമികള് പോലീസിനു നേര്ക്ക് തോക്കു ചൂണ്ടി വെടിവയ്ക്കുന്ന ദൃശ്യങ്ങളും പുറത്തു വന്നു. തോക്കുമായി എത്തിയ യുവാവ് എട്ടു റൗണ്ട് വെടിയുതിര്ത്തതായി ദൃക്സാക്ഷികള് പറഞ്ഞു.
അമേരിക്കന് പ്രസിഡന്റ് ഡോണള്ഡ് ട്രംപും സംഘവും എത്തുന്നതിന് തൊട്ടുമുന്പാണു ഡല്ഹിയില് കലാപം പൊട്ടിപ്പുറപ്പെട്ടത്. ഭജന്പുര്, മൗജ്പുര്, കര്ദംപുരി എന്നിവിട ങ്ങളാണു സംഘര്ഷമുണ്ടായത്. അക്രമികള് നിരവധി വാഹനങ്ങള്ക്ക് തീയിട്ടതോടെ പോലീസ് കണ്ണീര്വാതകം പ്രയോഗിച്ചു. സംഭവസ്ഥലത്ത് അര്ധസൈനിക വിഭാഗങ്ങളെയും വിന്യസിച്ചിട്ടുണ്ട്.