ഡൽഹി സംഘ് അഴിഞ്ഞാട്ടങ്ങൾക്കെതിരെ ജനരോഷമിരമ്പി: മലപ്പുറത്ത് ദേശീയപാത ഉപരോധിച്ചു

മലപ്പുറം: ഡൽഹിയിലെ ഭരണകൂട-സംഘ്പരിവാർ സംയുക്ത ആസൂത്രിത മുസ്‌ലിം വംശഹത്യ അവസാനിപ്പിക്കുക എന്ന് ആവശ്യപ്പെട്ട് മലപ്പുറത്ത് ജമാഅത്തെ ഇസ്ലാമി, സോളിഡാരിറ്റി, എസ്.ഐ.ഒ, ജമാഅത്ത് വനിത, ജി.ഐ.ഒ എന്നിവയുടെ സംയുക്ത ആഭിമുഖ്യത്തിൽ 'ഒക്കുപ്പൈ മലപ്പുറം' എന്ന തലക്കെട്ടിൽ മലപ്പുറത്ത് ദേശീയ പാത ഉപരോധവും പ്രതിഷേധ സായാഹ്നവും ബഹുജന റാലിയും സംഘടിപ്പിച്ചു.

ദൽഹിയിലെ സങ്കീർണ്ണമായ സാഹചര്യങ്ങളെക്കുറിച്ചും മനുഷ്യജീവനുകൾ നഷ്ടപ്പെടുന്നതിലേക്കു നയിച്ച സംഭവങ്ങളെ കുറിച്ചും 'ഒക്കുപ്പൈ മലപ്പുറം' പ്രതിഷേധം പ്രകടിപ്പിച്ചു.

നേതാക്കൾ ഒരുമിച്ച് പ്രവർത്തിക്കുകയും സമാധാനവും സ്വാഭാവികതയും ഉടനടി പുന: സ്ഥാപിക്കുകയും ചെയ്യേണ്ടതുണ്ട് എന്ന് പ്രതിഷേധ റാലി ആവശ്യപ്പെട്ടു. ചില രാഷ്ട്രീയക്കാർ അക്രമത്തിന് പരസ്യമായി പ്രേരണ നൽകുന്നു.അത് നിയന്ത്രിക്കാൻ ദില്ലി പോലീസിന് ഇതുവരെ കഴിഞ്ഞിട്ടില്ല.

കലാപം തടയാൻ ഒന്നും ചെയ്യാത്ത പോലീസിന്റെ സാന്നിധ്യത്തിൽ സായുധ സംഘങ്ങൾ കൊലപാതകങ്ങളും അഗ്നിക്കിരയാക്കലും നടത്തി. പോലീസ് കലാപകാരികളുമായി സഹകരിക്കുന്നതായി തെളിയുന്ന ദൃശ്യങ്ങൾ പുറത്തുവന്നു. കേന്ദ്രസർക്കാരിന്റെ നേരിട്ടുള്ള നിയന്ത്രണത്തിലുള്ള ക്രമസമാധാന സങ്കേതങ്ങൾ പൂർണ്ണമായ പരാജയമാണ്.

അക്രമത്തിന് പ്രകോപിപ്പിച്ച രാഷ്ട്രീയക്കാരെ ഉടൻ അറസ്റ്റ് ചെയ്യുക, ദൽഹി മുഖ്യമന്ത്രിയും എം‌.എൽ‌.എമാരും ദില്ലി എം‌പിമാരും പ്രമുഖ സമുദായ-മതനേതാക്കളും അക്രമബാധിത പ്രദേശങ്ങളിൽ യുദ്ധകാലാടിസ്ഥാനത്തിൽ പര്യടനം നടത്തുകയും പ്രശ്നങ്ങൾ അവസാനിപ്പിക്കാൻ ശ്രമിക്കുകയും ചെയ്യുക,

അക്രമം ഇപ്പോഴും നടക്കുന്ന പ്രദേശങ്ങളിൽ കർഫ്യൂ ഏർപ്പെടുത്തുക, പൗരന്റെ മതപരവും രാഷ്ട്രീയവുമായ ബന്ധം കണക്കിലെടുക്കാതെ നിയമം ലംഘിക്കുന്നവർക്കെതിരെയും അക്രമ പ്രവർത്തനങ്ങളിൽ ഏർപ്പെടുന്നവർക്കെതിരെയും ദില്ലി പോലീസ് കർശന നടപടികൾ സ്വീകരിക്കുക,

ന്യൂനപക്ഷ സമുദായത്തിനെതിരായ പോലീസിൻ്റെ മുൻവിധികളോടെയുള്ള നടപടികൾ അവസാനിപ്പിക്കുക, നിരപരാധികളായ സാധാരണ പൗരന്മാർക്കും സ്ത്രീകൾക്കും കുട്ടികൾക്കുമെതിരെ അതിക്രമങ്ങൾ നടത്തിയ ഉദ്യോഗസ്ഥർക്കെതിരെ പോലീസ് നടപടിയെടുക്കുക,

സോഷ്യൽ മീഡിയയിലും ടി.വി ചാനലുകളിലും അക്രമത്തിലേക്കും വിദ്വേഷത്തിലേക്കും ആളുകളെ പ്രേരിപ്പിക്കുന്ന നേതാക്കന്മാർക്കെതിരെ ഉടൻ നടപടിയെടുക്കുക, സി‌എ‌എ വിരുദ്ധ പ്രതിഷേധ കേന്ദ്രങ്ങളായ ഷാഹീൻ ബാഗ്,

ദില്ലിയിലെ മറ്റുള്ള ഇടങ്ങൾ എന്നിവയെ സാമൂഹ്യ വിരുദ്ധർ ഉപദ്രവിക്കാതിരിക്കാൻ പോലീസ് സംരക്ഷണം നൽകുക, അക്രമത്തിന്റെ മുഴുവൻ സാഹചര്യങ്ങൾ പരിശോധിക്കുന്നതിന് ഉന്നതതല ജുഡീഷ്യൽ അന്വേഷണം നടത്തുക എന്നീ ആവശ്യങ്ങൾ പ്രതിഷേധ റാലി ഉയർത്തി.

പ്രതിഷേധ റാലിക്ക് സോളിഡാരിറ്റി സംസ്ഥാന പ്രസിഡൻറ് നഹാസ് മാള, ജമാഅത്തെ ഇസ്ലാമി ജില്ലാ പ്രസിഡൻ്റ് സലീം മമ്പാട്, ജില്ലാ വൈസ് പ്രസിഡൻ്റ് മുസ്തഫാ ഹുസൈൻ, സോളിഡാരിറ്റി ജില്ലാ പ്രസിഡൻ്റ് ഡോ.നിഷാദ് കുന്നക്കാവ്,

ജനറൽ സെക്രട്ടറി ജലീൽ കോഡൂർ, എസ്.ഐ.ഒ ജില്ലാ ജനറൽ സെക്രട്ടറി ഫവാസ് അമ്പാളി, സെക്രട്ടറി പി.കെ.ഷബീർ, വനിതാ വിഭാഗം ജില്ലാ സെക്രട്ടറിമാരായ സി.എച്ച്.സാജിദ, ഖദീജ ഹൈദർ, ജി.ഐ.ഒ ജില്ലാ പ്രസിഡൻ്റ് കെ.സി. ഷനാനീറ നേതൃത്വം നൽകി.

ജമാഅത്തെ ഇസ്ലാമി കേരള സെക്രട്ടറി ശിഹാബ് പൂക്കോട്ടൂർ,സോളിഡാരിറ്റി സംസ്ഥാന പ്രസിഡൻ്റ് നഹാസ് മാള, ജമാഅത്തെ ഇസ്ലാമി ജില്ലാ പ്രസിഡൻ്റ് സലീം മമ്പാട് എന്നിവർ ആസാദി സ്‌ക്വയറിലെ പ്രതിഷേധസായാഹ്നത്തെ അഭിസംബോധന ചെയ്തു.

മലപ്പുറം മഹല്ല് കോഓഡിനേഷൻ കമ്മറ്റി ആസാദി സ്ക്വയറിനെ അഭിവാദ്യം ചെയ്ത് പ്രകടനം നടത്തി.കിളിയമണ്ണിൽ അജ്മൽ നേതൃത്വം നൽകി. അഡ്വ.എൻ.കെ മജീദ്, കെ.പി.അബ്ദു റഹ്മാൻ, കൊന്നോല യൂസുഫ്, എം.ബീരാൻ സംസാരിച്ചു.

നാളെ (വ്യാഴം) ആസാദി സ്ക്വയറിൽ കെ.പി.സി.സി മെംബറും ഡി.സി.സി ജനറൽ സെക്രട്ടറിയുമായ കെ.പി.നൗഷാദലി, യൂത്ത് ലീഗ് ജില്ലാ ജനറൽ സെക്രട്ടറി കെ.ടി.അഷ്റഫ്

അൽ ജാമിഅ ഫാക്കൾ റ്റി ഡീൻ എ.ടി ഷറഫുദ്ധീൻ സംസാരിക്കും.

ഫാഷിസത്തിനെതിരെ 'ബീറ്റ്സ് ഓഫ് മലപ്പുറ'ത്തിന്റെ പാട്ടുപ്രതിഷേധം ബിൻഷ, റബീഹ് മലപ്പുറം, ഷറഫലി പാണക്കാട് എന്നിവരുടെ നേതൃത്വത്തിൽ നടക്കും.