കല്ലടിക്കോടൻ മലകളുടെ പ്രകൃതി രമണീയതയും ആത്മ കഥാംശവും ചേർന്ന 'അപരാജിതൻ' പ്രകാശനം ചെയ്തു

പാലക്കാട്:  കല്ലടിക്കോടിന്റെ ദേശപ്പൊരുളിലേക്ക് ശ്രദ്ധ ക്ഷണിക്കുന്നതും കാല പ്രയാണത്തിൽ ഒരു ശാലീന ഗ്രാമത്തിനു സംഭവിച്ച മാറ്റങ്ങൾ ഉൾക്കൊള്ളുന്നതുമായ 'അപരാജിതൻ' എന്ന പുസ്തകം ഫ്രണ്ട്സ് ലൈബ്രറിയിൽ നടന്ന ചടങ്ങിൽ ദർശന കോളേജ് പ്രിൻസിപ്പൽ കെ.രാധാകൃഷ്ണൻ പ്രകാശനം ചെയ്തു.

ലൈബ്രറി പ്രസിഡന്റ് സി.കെ.രാജൻ മാസ്റ്റർ പുസ്തകം ഏറ്റുവാങ്ങി. മാധ്യമ പ്രവർത്തകൻ സമദ് കല്ലടിക്കോട് അധ്യക്ഷനായി. ദരിദ്ര പൂർണ്ണമായ ഒരു കാലത്തിന്റെ വിവരണവും അനുഭവവുമാണ് ആത്മകഥാംശമുള്ള ഈ പുസ്തകത്തിന്റെ ഉള്ളടക്കം. ശാസ്ത്രത്തിന്റേയും സാങ്കേതിക വിദ്യയുടേയും വളര്‍ച്ച ഗ്രാമീണതയിലും സഹവർത്തിത്വത്തിലും വരുത്തിയ മാറ്റങ്ങള്‍ ഉള്‍പ്പെടെയുള്ള പ്രാരാബ്ധങ്ങളും ആധുനികാനന്തര മാറ്റങ്ങളും ഈ പുസ്തകം അവതരിപ്പിക്കുന്നു.

പാറോക്കോടൻ എന്ന പേരിൽ എഴുതാറുള്ള റിട്ട.ജോയിന്റ് ലേബർ കമ്മീഷണർ പി.ഹസൈനാരാണ് പുസ്തകത്തിന്റെ രചയിതാവ്. അരുൺ മാസ്റ്റർ, അർജുൻ കെ.സി. പി.ഷാനവാസ് തുടങ്ങിയവർ പ്രകാശന ചടങ്ങിൽ സംസാരിച്ചു.