ഭിന്നശേഷിക്കാരായ കുട്ടികൾ ഗ്രാമീണ റോഡിന്റെ ഉദ്ഘാടകരായി. കൂട്ടിന് അമ്മമാരും

പാലക്കാട്: റവന്യൂ വകുപ്പ്പദ്ധതിയിൽ ഉൾപ്പെടുത്തി നിർമിച്ച തച്ചമ്പാറ ഗ്രാമപ്പഞ്ചായത്ത് പതിമൂന്നാം വാർഡിലെ കെ ജി എം ഓഡിറ്റോറിയം ഭാഗം റോഡിന്റെ ഉദ്ഘാടനം ഭിന്ന ശേഷി സഹോദരങ്ങളായ മുഹമ്മദ് ഷിബിലി, മുഹമ്മദ് റാഷിദ് എന്നിവർചേർന്ന് നിർവഹിച്ചു.

വാർഡ്മെമ്പർ ജോർജ് തച്ചമ്പാറ അധ്യക്ഷനായി. റെവന്യൂ വകുപ്പിൽ നിന്നും കിട്ടിയ അഞ്ചുലക്ഷം രൂപ ചെലവഴിച്ച് നിർമാണം നടത്തിയ കോൺക്രീറ്റ് റോഡാണിത്. സമൂഹത്തിന് കൂടി കരുതലായി ജനപ്രതിനിധി റോഡിന്റെ ഉദ്ഘാടനം വാർഡിലെ താമസക്കാരായ ഭിന്നശേഷി കുട്ടികളെ ഏൽപ്പിക്കുകയായിരുന്നു.

പിന്തുണയോടെ അമ്മമാരും. ഇതോടനുബന്ധിച്ച് ഗ്രാമസഭയും ജനമൈത്രി പോലീസിന്റെ ജന സുരക്ഷാ ക്ലാസും നടത്തി. ജനമൈത്രി ബീറ്റ് ഓഫീസർമാരായ ബിബീഷ്, പുഷ്പദാസ്, സിസ്റ്റർ ലിജി, ജെസി ടോമി തുടങ്ങിയവർ പ്രസംഗിച്ചു.