കല്ലടിക്കോട്: വനിതാ വികസനത്തിനും ക്ഷേമത്തിനും പുത്തന് പ്രതീക്ഷകള് പകർന്ന, സമൂഹത്തിന് അവഗണിക്കാന് കഴിയാത്ത ഒരു പ്രസ്ഥാനമായി കുടുംബശ്രീ മാറിയതായി കല്ലടിക്കോട് എസ്.ഐ അനിൽകുമാർ ടി.മേപ്പിള്ളി പറഞ്ഞു. തച്ചമ്പാറ പതിമൂന്നാം വാർഡ് എഡിഎസ് വാർഷികവും എസ്.എസ്.എൽ.സി, പ്ലസ് ടു സമ്പൂർണ്ണ എ പ്ലസ് വിജയികളെ ആദരിക്കലും ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
നാടിന്റെ സര്വതല സ്പര്ശിയായ വികസനത്തോടൊപ്പം സ്ത്രീകളുടെ സാമൂഹികവും സാമ്പത്തിക ഉന്നമനത്തിനും ഊര്ജം പകരുന്ന പ്രവര്ത്തനങ്ങളാണ് കുടുംബശ്രീനാളിതുവരെ നടത്തിയിട്ടുള്ളത്.
സമൂഹത്തിനാവശ്യമായ വിവിധ രംഗങ്ങളിലും സാധാരണക്കാര്ക്ക് ആവശ്യമുള്ള വസ്തുക്കളുടെ ഉല്പ്പാദനത്തിലും വിതരണത്തിലും ഏര്പ്പെട്ടുകൊണ്ടാണ് കുടുംബശ്രീ, കുടുംബിനികൾക്കിടയിൽ അംഗീകാരം നേടിയെടുത്തതെന്നും അദ്ദേഹം പറഞ്ഞു.
തൊഴിലുറപ്പ് പദ്ധതിയിൽ നൂറുദിനം പൂർത്തിയാക്കിയവരെയും, സ്ത്രീ ശാക്തീകരണത്തിലും സംഘാടനത്തിലും പതിനഞ്ചു വർഷം സാരഥ്യം വഹിച്ച എ ഡി എസ് ചെയർപേഴ്സൺ ജെസിടോമിയെയും ചടങ്ങിൽ ആദരിച്ചു. വാർഡ് മെമ്പർ ജോർജ് തച്ചമ്പാറ അധ്യക്ഷനായി.സിഡിഎസ് ചെയർപേഴ്സൺ അന്നമ്മ ജോൺ,വൈസ് ചെയർപേഴ്സൺ പ്രീത, തുടങ്ങിയവർ പ്രസംഗിച്ചു.