മണ്ണാർക്കാട്: ജനാധിപത്യത്തിൻ്റെ ശ്രീകോവിലുകളാണ് സ്കൂളുകളെന്നും പാർലിമെൻ്ററി ജനാധിപത്യത്തിൻ്റെ നാരായവേരുകൾ കുട്ടികൾക്ക് ബോധ്യപ്പെടേണ്ടത് സ്കൂളുകളിൽ നിന്നായിരിക്കണമെന്നും പ്രഖ്യാപിച്ചുകൊണ്ട് മണ്ണാർക്കാട് ജി.എം.യു.പി സ്കൂളിൽ സ്കൂൾ പാർലിമെൻ്റ് ശീതകാല സമ്മേളനം അരങ്ങേറി.
നയപ്രഖ്യാപന പ്രസംഗം ഗവർണർ ഫരീദ അക്ബർ നിർവഹിച്ചു. സ്പീക്കർ അംന കെ.സുബൈർ ചടങ്ങുകൾ നിയന്ത്രിച്ചു. പ്രളയാനന്തര കേരളത്തിൻ്റെ പുന:സൃഷ്ടിപ്പിനെ കുറിച്ച് മുഖ്യമന്ത്രി അസ്മിൻ നൈല ആമുഖഭാഷണത്തിൽ വിശദീകരിച്ചു.
മികച്ച പാർലിമെൻ്റേറിയനായി കേരളത്തിൽ നിന്ന് തിരഞ്ഞെടുക്കപ്പെട്ട, ഡൽഹി പാർലിമെൻ്റ് സന്ദർശിച്ചവടശ്ശേരിപ്പുറം ഗവ.ഹൈസ്കൂൾ വിദ്യാർത്ഥിയായ മുഹമ്മദ് നാസിം വിശിഷ്ടാതിഥിയായി പങ്കെടുത്തു.
ശേഷം നടന്ന ചോദ്യോത്തര വേളയിൽ അംഗങ്ങൾ ഉന്നയിച്ച ചോദ്യങ്ങൾക്ക് വകുപ്പുതല മന്ത്രിമാരായ ഹൂദ്യാ കൃഷ്ണ ,ആയിഷ ഷാലിമ, അൻഷിദ, മുഹമ്മദ് നസീം എന്നിവർ മറുപടി നൽകി. പ്രധാനാധ്യാപകൻ കെ.കെ.വിനോദ്കുമാർ, എം.എൻ.കൃഷ്ണകുമാർ ,പി.ബഷീർ, എന്നിവർ സംബന്ധിച്ചു.