രണ്ടു കടുക്കാച്ചി മീനുകളെ പിടിച്ചു ; ട്രോളുകളെ കൂസാതെ കൂത്തുപറമ്പ് ചൂണ്ടയിടൽ മത്സരത്തിൽ വിജയിയായി പൊന്ന്യം സ്വദേശി

കണ്ണൂർ: ട്രോളുകളെ കൂസാതെ ചൂണ്ടയിടൽ മത്സരം നടത്തി കണ്ണൂരിലെ ഡിവൈഎഫ്ഐ തയ്യിൽമുക്ക് യൂണിറ്റ്. കൂത്തുപറമ്പ് രക്തസാക്ഷി ദിനാചരണത്തോട് അനുബന്ധിച്ച് നടത്തിയ ചൂണ്ടയിടൽ മത്സരത്തിൽ രണ്ട് കടുക്കാച്ചി(കടുങ്ങാലി) മീനുകളെ പിടികൂടിയ പൊന്ന്യം സ്വദേശി എം. അനീഷ് വിജയിയായി. എം സുജേഷിനാണ് രണ്ടാം സ്ഥാനം.

ചൂണ്ടയും ഇരയുമായി എത്തി 11 പേരാണ് മത്സരത്തിൽ പങ്കെടുത്തത്. ഇതിൽ ആറു പേരുടെ ചൂണ്ടയിൽ മീൻ കുടുങ്ങി. അനീഷിന്‍റെയും സുജേഷിന്‍റെയും ചൂണ്ടയിൽ ഒരുമണിക്കൂറിനിടെ രണ്ട് മീനുകൾ കുടുങ്ങി. ഇതേത്തുടർന്ന് മീനിന്‍റെ തൂക്കം നോക്കിയാണ് വിജയികളെ നിശ്ചയിച്ചത്.