മനോരമയോ മാതൃഭൂമിയോ .. സര്‍വ്വേ ഏതായാലും ജനപ്രിയതയില്‍ ഉമ്മന്‍ചാണ്ടി പിണറായിയേക്കാള്‍ ബഹുദൂരം മുന്നില്‍ ! വിഎസും കുമ്മനവും ചെന്നിത്തലയും ജനപ്രിയര്‍

തിരുവനന്തപുരം: മനോരമ സര്‍വ്വേയ്ക്ക് പിന്നാലെ മാതൃഭൂമി സര്‍വ്വേയിലും സംസ്ഥാനത്തെ ഏറ്റവും ജനപ്രിയ നേതാവായി തെരെഞ്ഞെടുക്കപെട്ടത് ഉമ്മന്‍ചാണ്ടി തന്നെ. പിണറായി വിജയനെ ബഹുദൂരം പിന്നിലാക്കിയാണ് ഉമ്മന്‍ചാണ്ടിയുടെ മുന്നേറ്റം എന്നതാണ് ശ്രദ്ധേയം.

കഴിഞ്ഞ ഒന്നര പതിറ്റാണ്ടുകാലം കേരളത്തിലെ ജനപ്രിയ നേതാക്കളില്‍ ഒന്നാം സ്ഥാനത്തുണ്ടായിരുന്ന വി എസ് അച്യുതാനന്ദനും മൂന്നാം സ്ഥാനത്തായി ബഹുദൂരം പിന്നില്‍ തന്നെ.

മാതൃഭൂമി ന്യൂസ്- എ സി നീല്‍സണ്‍ സര്‍വേയിലാണ് ഇന്ന് കേരളത്തിലെ ഏറ്റവും ജനപ്രിയനായ നേതാവായി ഉമ്മന്‍ ചാണ്ടി തെരെഞ്ഞെടുക്കപെട്ടത്. 32%പേരാണ് ഉമ്മന്‍ ചാണ്ടിയെ പിന്തുണച്ചത്. അതേസമയം രണ്ടാം സ്ഥാനത്തുള്ള മുഖ്യമന്ത്രി പിണറായി വിജയന് 25% പേരുടെ പിന്തുണ മാത്രമാണ് ഉള്ളത് .

15% പേരുടെ പിന്തുണയോടെ വി എസ് അച്യുതാനന്ദന്‍ മൂന്നാം സ്ഥാനത്തെത്തിയപ്പോള്‍ തൊട്ടുപിന്നില്‍ 13% പിന്തുണ നേടി കുമ്മനം രാജശേഖരനാണ് നാലാമത്. ജനപ്രിയ നേതാക്കളുടെ ലിസ്റ്റില്‍ രമേശ്‌ ചെന്നിത്തലയുമുണ്ട് .