ന്യൂഡല്ഹി: ഇന്ത്യയോടുള്ള കൂറ് ബിജെപിക്ക് പണയം വെക്കാന് തയാറല്ലെന്ന് ഇല്തിജ മുഫ്തി. ജമ്മു കാഷ്മീരിലെ ഞെട്ടിക്കുന്ന യാഥാര്ഥ്യങ്ങള് വെളിപ്പെടുത്തിയും നരേന്ദ്ര മോദി സര്ക്കാരിനെതിരേ അതിരൂക്ഷ വിമര്ശനങ്ങളുന്നയിച്ചുമാണ് ജമ്മു കാഷ്മീരില് വീട്ടുതടങ്കലില് കഴിയുന്ന മുന് മുഖ്യമന്ത്രി മെഹബൂബ മുഫ്തിയുടെ മകള് ഇല്തിജ മുഫ്തി ഡല്ഹിയില് മാധ്യമ പ്രവര്ത്തകരോടു സംസാരിച്ചത്.
ജമ്മു കാഷ്മീരിലെ പ്രാദേശിക പാര്ട്ടികളോടും കേന്ദ്ര സര്ക്കാരിനോടും ജനങ്ങള്ക്ക് കടുത്ത വിരോധമുണ്ട്. പ്രത്യേകിച്ച് കേന്ദ്ര സര്ക്കാരിനോട് അവര്ക്ക് കടുത്ത വിദ്വേഷം ആണുള്ളത്.
ഭരണഘടനയുടെ 370ാം അനുച്ഛേദം നീക്കം ചെയ്ത ശേഷം കാഷ്മീരില് സ്വൈര്യമായി ചുറ്റിക്കറങ്ങാന് കഴിയുന്നുവെങ്കില് കേന്ദ്ര ആഭ്യന്തര മന്ത്രിയെ താന് സലാം വെക്കാന് തയാറാണെന്നും ഇല്തിജ തുറന്നടിച്ചു. പ്രധാനമന്ത്രി നരേന്ദ്ര മോദിയോട് ബഹുമാനം ഉണ്ട്. എന്നാല്, അദ്ദേഹം തെറ്റിദ്ധരിപ്പിക്കപ്പെട്ടിരിക്കുകയാണോ അതോ ബോധപൂര്വം രാജ്യത്തെ തെറ്റിദ്ധരിപ്പിക്കാന് ശ്രമിക്കുകയാണോ എന്നാണ് ഇല്തിജ ചോദിച്ചത്.