ചണ്ഡിഗഡ്: ഡല്ഹിയില് കര്ഷക പ്രക്ഷോഭം രൂക്ഷമായി തുടരുന്നതിനിടെ പദ്മവിഭൂഷണ് പുരസ്കാരം തിരിച്ചു നല്കി പഞ്ചാബ് മുന് മുഖ്യമന്ത്രിയും ശിരോമണി അകാലിദള് നേതാവുമായ പ്രകാശ് സിംഗ് ബാദല്. കേന്ദ്ര സര്ക്കാരിന്റെ പുതിയ കാര്ഷിക നിയമങ്ങള് രാജ്യത്തെ കര്ഷകരോടുള്ള വഞ്ചനയാണെന്ന് ആരോപിച്ചാണ് ബാദല് പുരസ്കാരം തിരിച്ചു നല്കിയതെന്ന് എഎന്ഐ വാര്ത്താ ഏജന്സി റിപ്പോര്ട്ട് ചെയ്തു.
അതേസമയം, വിവാദ കാര്ഷിക നിയമങ്ങള് പിന്വലിക്കാന് സര്ക്കാരിനു മുന്നിലുള്ള അവസാന അവസരം ഇന്നാണെന്നു വ്യക്തമാക്കി തലസ്ഥാന അതിര്ത്തിയില് കര്ഷകര് പ്രക്ഷോഭം കടുപ്പിക്കുകയാണ്. കര്ഷക പ്രക്ഷോഭം എട്ടാം ദിവസത്തിലേക്കു കടക്കുന്പോള് ഡല്ഹിയിലേക്കുള്ള സുപ്രധാന റോഡുകളില് അതിരൂക്ഷ ഗതാഗത സ്തംഭനമാണ്.
അതിനിടെ, കര്ഷക സമരത്തിന് ഐക്യദാര്ഢ്യം പ്രഖ്യാപിച്ച് രാജ്യവ്യാപകമായി ചരക്കുനീക്കം സ്തംഭിപ്പിക്കുമെന്ന് ഓള് ഇന്ത്യ മോട്ടോര് ട്രാന്സ്പോര്ട്ട് കോണ്ഗ്രസ് (എഐഎംടിസി) മുന്നറിയിപ്പു നല്കി. ഡല്ഹി സര്വകലാശാല വിദ്യാര്ഥികളും അധ്യാപക സംഘടനകളും (ഡല്ഹി ടീച്ചേഴ്സ് അസോസിയേഷന്) കര്ഷക സമരത്തിന് ഐക്യദാര്ഢ്യം പ്രഖ്യാപിച്ചു.
കാര്ഷിക നിയമങ്ങള് പിന്വലിക്കാന് സര്ക്കാരിനു മുന്നിലുള്ള അവസാന അവസരം ഇന്നാണെന്നും ഇല്ലെങ്കില് സര്ക്കാരിന്റെ വലിയ വീഴ്ചയ്ക്ക് അതു വഴിയൊരുക്കുമെന്നും കര്ഷക സംഘടനകള് മുന്നറിയിപ്പു നല്കി. ഡിസംബര് അഞ്ചിന് രാജ്യവ്യാപകമായി പ്രതിഷേധത്തിനും പ്രധാനമന്ത്രി നരേന്ദ്ര മോദിയുടെയും കുത്തകകളുടെയും കോലം കത്തിക്കാനും ക്രാന്തികാരി കിസാന് യൂണിയന് ആഹ്വാനം ചെയ്തു.
പ്രത്യേക പാര്ലമെന്റ് സമ്മേളനം വിളിച്ചുചേര്ത്ത് കേന്ദ്ര സര്ക്കാര് പാസാക്കിയ കാര്ഷിക ബില്ലുകള് പിന്വലിക്കണമെന്നാണ് ക്രാന്തികാരി കിസാന് യൂണിയന് പ്രസിഡന്റ് ദര്ശന് പാല് ആവശ്യപ്പെട്ടത്.