തിരുവനന്തപുരം: സംസ്ഥാന ഫയര്ഫോഴ്സിലും ഇന്റലിജന്സ്, വിജിലന്സ് ടീം രൂപീകരിക്കാന് തീരുമാനം. ഫയര്ഫോഴ്സ് മേധാവി എഡിജിപി ബി.സന്ധ്യയാണ് പുതിയ പരിഷ്കാരം നടപ്പിലാക്കുന്നത്.
മുഖ്യമന്ത്രിയുടെ നിര്ദേശാനുസരണമാണ് പുതിയ പരിഷ്കാര നടപടികളുമായി ഫയര്ഫോഴ്സ് മേധാവി മുന്നോട്ടുപോകുന്നത്. പുതിയ പരിഷ്കാരം ഫയര്ഫോഴ്സിന് ഏറെ ഗുണകരമാകുമെന്ന പ്രതീക്ഷയിലാണ് വകുപ്പ്.
കെട്ടിട നിര്മ്മാണത്തിന് ഫയര്ഫോഴ്സിന്റെ എന്ഒസി ലഭിക്കുന്നതിനായി വ്യാപകമായി കോഴ കൈപ്പറ്റുന്നുവെന്ന പരാതികളുടെ അടിസ്ഥാനത്തിലാണ് പുതിയ പരിഷ്കാരം. അപേക്ഷകള് വൈകിപ്പിച്ച് അപേക്ഷകരില് നിന്നും ചില ഉദ്യോഗസ്ഥര് കോഴ വാങ്ങാറുണ്ടെന്ന വിവരങ്ങള് പുറത്തുവന്ന സാഹചര്യത്തിലാണ് ഫയര്ഫോഴ്സിന്റെ എന്ഒസി സംവിധാനം സുതാര്യമാക്കാനും തീരുമാനിച്ചിരിക്കുന്നത്.
ഇനി മുതല് കെട്ടിട നിര്മാണ എന്ഒസി ലഭിക്കാന് ഓണ്ലൈനിലൂടെ അപേക്ഷ സമര്പ്പിക്കാവുന്നതാണ്. അതിനായുള്ള നടപടികള് പുരോഗമിക്കുകയാണെന്ന് ഫയര്ഫോഴ്സ് മേധാവി എഡിജി പറഞ്ഞു.
പുതിയ പരിഷ്കാരങ്ങള് കാര്യക്ഷമമായി നടപ്പിലാക്കാന് നിലവിലുള്ള ഉദ്യോഗസ്ഥര്ക്ക് പ്രത്യേകം പരിശീലനം നല്കാനുള്ള നടപടികള് സ്വീകരിച്ചിരിക്കുകയാണ്. സംസ്ഥാനത്തെ തീപിടിത്ത സാധ്യതയുള്ള കെട്ടിടങ്ങളുടെ പൂര്ണ വിവരങ്ങള് ഫയര്ഫോഴ്സിലെ ഇന്റലിജന്സ് വിഭാഗം ശേഖരിച്ച് ഫയര്ഫോഴ്സ് മേധാവിക്ക് റിപ്പോര്ട്ട് സമര്പ്പിക്കും.