തിരുവനന്തപുരം: സംസ്ഥാനത്തെ മുഴുവൻ വിദ്യാർഥികൾക്കും പാഠപുസ്തകങ്ങൾ ലഭ്യമാക്കുക എന്നാവശ്യപ്പെട്ടു കൊണ്ട് സംസ്ഥാനത്തെ ഡി.ഡി.ഇ- എ.ഇ.ഒ ഓഫീസുകളിലേക്കുള്ള ഫ്രറ്റേണിറ്റി മൂവ്മെൻറ് പ്രതിഷേധ മാർച്ച് ഇന്ന്.
കോവിഡ് 19 പശ്ചാത്തലത്തിൽ ഓൺലൈൻ ക്ലാസുകൾ ആരംഭിച്ചിട്ടും പാഠപുസ്തകങ്ങൾ ലഭ്യമാക്കാൻ സർക്കാരിനും പൊതു വിദ്യാഭ്യാസ വകുപ്പിനും സാധിച്ചിട്ടില്ല. പാഠപുസ്തക അച്ചടിയും വിതരണവും കാലതാമസമില്ലാതെ പൂർത്തീകരിക്കുമെന്ന സർക്കാർ പ്രഖ്യാപനം പാലിക്കപ്പെട്ടിട്ടില്ല.
ഈ സാഹചര്യത്തിലാണ് എല്ലാ വിദ്യാർഥികൾക്കും പാഠപുസ്തകം ഉടൻ ലഭ്യമാക്കണമെന്ന ആവശ്യമുന്നയിച്ച് തിരുവനന്തപുരം ജില്ലയിലെ ആറ്റിങ്ങൽ , നെയ്യാറ്റിൻകര ഡി.ഇ.ഒ, കണിയാപുരം, നെടുമങ്ങാട്, പാലോട് എ.ഇ.ഒ ഓഫീസുകളിലേക്ക് ഫ്രറ്റേണിറ്റിയുടെ ആഭിമുഖ്യത്തിൽ പ്രതിഷേധ മാർച്ച് നടത്തുന്നതെന്ന് ജില്ല പ്രസിഡണ്ട് ആദിൽ അബ്ദുൽ റഹിം വാർത്താ കുറിപ്പിൽ അറിയിച്ചു. വ്യത്യസ്ത കേന്ദ്രങ്ങളിൽ നടക്കുന്ന പ്രതിഷേധ പരിപാടിയിൽ സംസ്ഥാന നേതാക്കൾ പങ്കെടുക്കും.