പാരീസ്: പാക്കിസ്ഥാനു ഫിനാന്ഷ്യല് ആക്ഷന് ടാസ്ക് ഫോഴ്സ് (എഫ്എടിഎഫ്) യോഗത്തില് തിരിച്ചടി. ഭീകരസംഘടനകള്ക്ക് സാമ്പത്തിക സഹായം നല്കുന്ന വിഷയത്തില് പാക്കിസ്ഥാനെ നിരീക്ഷണപ്പട്ടികയില് (ഗ്രേ ലിസ്റ്റ്) നിലനിര്ത്താന് പാരീസില് നടന്ന എഫ്എടിഎഫ് യോഗത്തില് തീരുമാനമെടുത്തു.
ഭീകരസംഘടനകള്ക്കുള്ള സാമ്പത്തിക സ്രോതസ് ഇല്ലാതാക്കുന്നതിനും സാമ്പത്തിക കുറ്റകൃത്യങ്ങള് തടയുന്നതിനുമുള്ള അന്താരാഷ്ട്ര കൂട്ടായ്മയാണ് എഫ്എടിഎഫ്.
ടാസ്ക് ഫോഴ്സിന്റെ ആക്ഷന് പ്ലാന് നടപ്പാക്കിയത് സംബന്ധിച്ച് ഇമ്രാന് ഖാന് സര്ക്കാര് സമര്പ്പിച്ച റിപ്പോര്ട്ട് വിലയിരുത്തിയ ശേഷമായിരുന്നു നടപടി. പാക് മന്ത്രി ഹമദ് അസ്ഹറിന്റെ സാന്നിധ്യത്തിലായിരുന്നു വിലയിരുത്തല്. പാക്കിസ്ഥാന് സ്വീകരിച്ച ഭീകരവിരുദ്ധ നടപടികളില് എഫ്എടിഎഫ് യോഗം അസംതൃപ്തി പ്രകടിപ്പിച്ചു.
2018 ജൂണില് എഫ്എടിഎഫ് പാകിസ്ഥാനെ ഗ്രേ ലിസ്റ്റില് ഉള്പ്പെടുത്തിയിരുന്നു. തുടര്ന്ന് ഭീകരര്ക്ക് സാമ്പത്തിക സഹായം തടയാന് ആക്ഷന് പ്ലാന് നിര്ദേശിച്ചു. കഴിഞ്ഞവര്ഷം ഒക്ടോബറില് നടന്ന യോഗത്തില് ഇതുസംബന്ധിച്ച റിപ്പോര്ട്ട് വിലയിരുത്തി. ഇതിനുശേഷം പാക്കിസ്ഥാനെ 2020 ഫെബ്രുവരി വരെ ഗ്രേ ലിസ്റ്റില് നിലര്ത്താന് തീരുമാനിക്കുകയായിരുന്നു.