ചണ്ഡീഗഢ്: ദേശീയപാതയിലെ ടോള്പ്ലാസയ്ക്ക് സമീപം പെണ്കുട്ടിയെ കത്തിമുനയില്നിര്ത്തി കൂട്ടബലാത്സംഗം ചെയ്തു. ഹരിയാനയിലെ കര്ണാലില് ഞായറാഴ്ച രാത്രിയായിരുന്നു സംഭവം. പഞ്ചാബിലെ ലുധിയാന സ്വദേശിനിയായ പെണ്കുട്ടിയാണു പീഡനത്തിനിരയായത്. പാനിപ്പട്ടില് ബന്ധുക്കളെ കണ്ടു തിരിച്ചുവരുന്പോഴാണു സംഭവം നടന്നതെന്ന് പോലീസ് പറയുന്നു.
പാനിപ്പട്ടില്നിന്നു ബസില് മടങ്ങുന്നതിനിടെ പെണ്കുട്ടിയും ഭര്ത്താവും ദേശീയപാതയില് ടോള്പ്ലാസയ്ക്കു സമീപം ഇറങ്ങി. തുടര്ന്നു ഭര്ത്താവ് ചായ കുടിക്കാനും പെണ്കുട്ടി സമീപത്തെ ശുചിമുറിയിലേക്കും പോയി. ഇതിനിടെ രണ്ടുപേര് കത്തി കാട്ടി പെണ്കുട്ടിയെ തട്ടിക്കൊണ്ടുപോയി ടോള്പ്ലാസയ്ക്കു സമീപത്തെ അണ്ടര്പാസില്വച്ചു ബലാത്സംഗം ചെയ്യുകയായിരുന്നു.
സംഭവത്തിനുശേഷം രണ്ടു പ്രതികളും സ്ഥലത്തുനിന്നു രക്ഷപ്പെട്ടു. പീഡനത്തിനിരയായ പെണ്കുട്ടി പിന്നീട് ഭര്ത്താവിനൊപ്പം പോലീസ് സ്റ്റേഷനിലെത്തി പരാതി നല്കുകയായിരുന്നു.