രണ്ട് ദിവസം മുമ്പ് നടന്ന ഒരു ചടങ്ങില് മുഖ്യമന്ത്രി പിണറായി വിജയന് സംസാരിക്കുമ്പോള് വേദിയിലിരിക്കുന്ന മോഹന്ലാലിന് ആരാധകര് ആര്പ്പുവിളിച്ചത് സോഷ്യല് മീഡിയയില് ചര്ച്ചയായിരുന്നു.
ഇപ്പോഴിതാ സംഭവത്തെ രൂക്ഷമായി വിമര്ശിച്ച് രംഗത്തെത്തിയിരിക്കുകയാണ് ചലച്ചിത്ര താരം ഹരീഷ് പേരടി. മോഹന്ലാല് ആരാധകരെ നിയന്ത്രിക്കണമായിരുന്നെന്നും ഔദ്യോഗിക പദവികളെ ഫാന്സ് ബഹുമനിച്ചേ പറ്റൂവെന്നും ഹരീഷ് പേരടി ഫേസ്ബുക്കില് കുറിച്ചു.
ഫേസ്ബുക്ക് പോസ്റ്റിന്റെ പൂര്ണ്ണരൂപം
സംസ്ഥാനത്തിന്റെ മുഖ്യമന്ത്രി സംസാരിക്കുമ്പോള് അദ്ദേഹത്തെ സംസാരിക്കാന് സമ്മതിക്കാതെ ആര്പ്പു വിളിച്ച ഫാന്സിനെ ലാലേട്ടന് നിയന്ത്രിക്കണമായിരുന്നു . അത് പിണറായിയായാലും,മോദിയായാലും അമിത് ഷായായാലും ഉമ്മന് ചാണ്ടി യായാലും രമേഷ് ചെന്നിത്തലയായാലും ഔദ്യോഗിക പദവികളെ എത് ഫാന്സും ബഹുമാനിച്ചെ പറ്റു..
അതല്ലങ്കില് ജനാധിപത്യ രീതിയിലൂടെ അവര്ക്കെതിരെ അവരുടെ നയങ്ങളെ ജനങ്ങള്ക്കു മുന്നില് തുറന്ന് കാണിക്കുന്ന സമരം ചെയ്യണം. ലോക സിനിമയിലെ നല്ല പത്ത് നടന്മാരില് ഒരാളാണ് എന്ന് ഞാന് വിശ്വസിക്കുന്ന എന്റെ പ്രിയപ്പെട്ട ലാലേട്ടന് ഈ ആരാധക കൂട്ടത്തിന് ഒരു കടിഞ്ഞാണിടുമെന്ന് വിശ്വസിച്ചു കൊണ്ട് . എന്റെ ഈ പോസ്റ്റിന് ഫാന്സിന്റെ എല്ലാ തെറി വിളികളെയും സ്വാഗതം ചെയ്യുന്നു. ലാലേട്ടനെ പറ്റി നല്ലതു പറഞ്ഞപ്പോള് നിങ്ങളുടെ പൂച്ചെണ്ടുകള് ഞാന് ഏറ്റു വാങ്ങിയിട്ടുണ്ട് . അതിന് നന്ദിയും പറയുന്നു .എന്നാലും പറയാനുള്ളത് പറഞ്ഞു കൊണ്ടേയിരിക്കും.