ന്യൂഡല്ഹി: രാജ്യത്ത് കോവിഡ് പരിശോധനയില് കഴിഞ്ഞ ഏതാനും മാസങ്ങളായി വലിയ തോതില് മുന്നേറ്റം ഉണ്ടാക്കാന് സാധിച്ചുവെന്ന് ഐസിഎംആര് ഡയറക്ടര് ഡോ. ബല്റാം ഭാര്ഗവ. പ്രതിദിനം 1.1 ലക്ഷം സാംപിളുകളാണ് പരിശോധിക്കുന്നത്. 612 പരിശോധനാലാബുകള് രാജ്യത്തുണ്ട്. ഇതില് 430 എണ്ണം സര്ക്കാര് ലാബുകളാണെന്നും അദ്ദേഹം വ്യക്തമാക്കി.
രാജ്യത്ത് കോവിഡ് പ്രതിരോധത്തിനായി ഹൈഡ്രോക്സിക്ലോറോക്വിന് ഉപയോഗിക്കുന്നത് തുടരുമെന്നും അദ്ദേഹം പറഞ്ഞു. ഹൈഡ്രോക്സിക്ലോറോക്വിന് ഉപയോഗിക്കുന്നത് നിരീക്ഷിച്ചതില് ചെറിയതോതില് ഓക്കാനം, ഛര്ദി, നെഞ്ചിടിപ്പ് കൂടല് തുടങ്ങിയ അസ്വസ്ഥതകള് അല്ലാതെ വലിയ പാര്ശ്വഫലങ്ങളൊന്നും ഇതുവരെ ഉണ്ടായിട്ടില്ല, ഫലം ലഭിക്കുന്നതിനാല് ഈ മരുന്ന് ഉപയോഗിക്കുന്നത് തുടരാനാണ് ഐസിഎംആര് നല്കിയ നിര്ദേശം. എയിംസ്, ഐസിഎംആര് കഴിഞ്ഞ ആറാഴ്ച നടത്തിയ പഠനങ്ങളെ തുടര്ന്നാണ് ഈ നിര്ദേശം നല്കിയത്. ഹൈഡ്രോക്സിക്ലോറോക്വിന് മലേറിയ ചികിത്സിക്കാന് ഉപയോഗിക്കുന്ന മരുന്നാണ്. അതില് അടങ്ങിയിരിക്കുന്ന ആന്റി വൈറല് ഘടകങ്ങള് കോവിഡിന് ഫലപ്രദമാണെന്നതിനാല് പരീക്ഷണാടിസ്ഥാനത്തിലാണ് ഇത് ഉപയോഗിക്കുന്നത്. ഐസിഎംആറിന്റെ മേല്നോട്ടത്തിലാണ് ഇത് നടക്കുന്നത്.
കോവിഡ് ചികിത്സക്കായി ആന്റി മേലറിയ മരുന്നായ ഹൈഡ്രോക്സിക്ലോറോക്വിന്റെ ക്ലിനിക്കല് പരീക്ഷണം ഡബ്ല്യുഎച്ച്ഒ താത്കാലികമായി റദ്ദാക്കിയിരുന്നു. സുരക്ഷാ ആശങ്കയെ തുടര്ന്ന് മുന്കരുതല് നടപടിയുടെ ഭാഗമായിട്ടാണ് പരീക്ഷണം റദ്ദാക്കിയത്.