ചെന്നൈ: കമല്ഹാസന് ചിത്രം "ഇന്ത്യന് 2' ചിത്രീകരണ സ്ഥലത്ത് അപകടത്തില് മൂന്നുപേര് മരിക്കാനിടയായ സംഭവത്തില് ക്രെയിന് ഓപ്പറേറ്ററെ പോലീസ് ചോദ്യം ചെയ്തു. സംഭവശേഷം ഒളിവില് പോയ ക്രെയിന് ഓപ്പറേറ്റര് രാജനെയാണ് പോലീസ് ചോദ്യം ചെയ്തത്.
ഓപ്പറേറ്ററുടെ അശ്രദ്ധയാണ് അപകടത്തിന് കാരണമെന്ന് ചൂണ്ടിക്കാട്ടി പ്രൊഡക്ഷന് മാനേജര് നല്കിയ പരാതിയുടെ അടിസ്ഥാനത്തിലാണ് ഇയാളെ കസ്റ്റഡിയിലെടുത്തത്.
നഗരപ്രാന്തത്തിലെ നസ്രത്പെട്ടിലുള്ള സ്വകാര്യ ഫിലിം സിറ്റിയില് ബുധനാഴ്ച രാത്രിയായിരുന്നു സംഭവം.കമല്ഹാസനും സംവിധായകന് ശങ്കറും തലനാരിഴയ്ക്കാണ് അപകടത്തില്നിന്നു രക്ഷപ്പെട്ടത്.
ക്രെയിന് ഓപ്പറേറ്ററുടെ അനാസ്ഥകൊണ്ട് മൂന്നുപേര് മരിക്കാനിടയായതുള്പ്പെടെ വിവിധ വകുപ്പുകള് ചുമത്തി കസ്റ്റഡിയിലെടുത്തത്. എന്നാല് ഓപ്പറേറ്റര് അപകടത്തെക്കുറിച്ച് കൂടുതല് വിവരങ്ങള് നല്കിയിട്ടില്ലെന്നും അന്വേഷണ ഉദ്യോസ്ഥന് പറഞ്ഞു.