ന്യൂഡല്ഹി: അതിവേഗം വ്യാപിക്കുന്ന ജനിതക മാറ്റം വന്ന കോവിഡ് ബ്രിട്ടണില് കണ്ടെത്തിയതിനെ തുടര്ന്ന് നിര്ത്തിവെച്ച ഇന്ത്യയില് നിന്ന് യു.കെ.യിലേക്കും തിരിച്ചുമുളള വിമാന സര്വീസ് ജനുവരി എട്ട് മുതല് പുനരാരംഭിക്കും. ജനുവരി 8 മുതൽ നിയന്ത്രിതമായ രീതിയിൽ വീണ്ടും വിമാനസർവീസുകൾ തുടങ്ങുമെന്ന് കേന്ദ്രവ്യോമയാനമന്ത്രി ഹർദീപ് സിംഗ് പുരി വ്യക്തമാക്കി.
''ജനുവരി 8 2021 മുതൽ വിമാനങ്ങൾ ഇന്ത്യയിൽ നിന്ന് യുകെയിലേക്കും യുകെയിൽ നിന്ന് തിരികെയും സർവീസ് തുടങ്ങും. ജനുവരി 23 വരെ ആഴ്ചയിൽ 15 ഫ്ലൈറ്റുകൾ മാത്രമേ സർവീസ് നടത്തൂ. ഡല്ഹി, മുംബൈ, ബെംഗളുരു, ഹൈദരാബാദ് എന്നീ നഗരങ്ങളിലേക്ക് മാത്രമേ സർവീസുകളുണ്ടാകൂ. കൃത്യമായി ഏതെല്ലാം വിമാനങ്ങൾ, എപ്പോഴെല്ലാം സർവീസ് നടത്തുമെന്ന വിവരം വ്യോമയാന അതോറിറ്റി പുറത്തുവിടും'', ഹർദീപ് സിംഗ് പുരി ട്വീറ്റ് ചെയ്തു.
ഡിസംബര് അവസാനവാരത്തോടെയാണ് ഇന്ത്യ-യു.കെ. വിമാന സര്വീസ് താത്കാലികമായി റദ്ദാക്കിയത്.